اقش پەن ءۇندىستان اراسىندا ساۋدا سوعىسى باستالماق

اقش پەن ءۇندىستان ساۋدا سوعىسىنىڭ جاڭا كەزەڭىنە قادام باستى. تاراپتار اراسىنداعى تارتىس قۇراما شتاتتارىنىڭ قىتايمەن ساۋدا سوعىسىمەن سالىستىرعاندا، ايتارلىقتاي جوعارى ەمەس. دەگەنمەن، رەسمي ۋاشينگتون نيۋ-دەليگە بىرقاتار ەكونوميكالىق شارالار قابىلداپ ۇلگەردى.

مالىمەتتەر بويىنشا، 2018 جىلى ءۇندىستان اقش-قا 80 ميلليارد دوللارعا تاۋار ەكپورتتاعان. ونىڭ تەك 5 ميللياردىنا باج سالىعى ەنگىزىلمەگەن. كەيىننەن اقش اكىمشىلىگى وسى ەلدەن جەتكىزىلەتىن اليۋميني مەن قۇرىشقا باج سالىعىن كوتەردى جانە ساۋدا جەڭىلدىكتەرىنىڭ كۇشىن جويدى. ءۇندىستان دا قارسى شارالارعا كوشىپ، اقش-تان يمپورتتالاتىن 28 تاۋارعا باج سالىعىن ارتتىرعان. بۇل شامامەن 220 ميلليون دوللارعا باعالانعان ونىمدەرگە قاتىستى.

وسىعان قاتىستى مالىمدەمە جاساعان امەريكالىق زاڭگەر مانسي سەت: «اقش-پەن قاتىناستارىندا ءۇندىستان ساۋدا مارتەبەسىنىڭ وزگەرۋى نەگە اكەلەتىنىن ويلانۋ كەرەك. سونداي-اق مەملەكەتتەگى ىشكى جاعدايدى ءتۇسىنۋ دە ماڭىزدى. قايتا سايلانعان پرەمەر نارەندرا مودي ەلدە ەكونوميكالىق ءوسىمدى قامتاماسىز ەتۋگە بار كوڭىلىن سالىپ وتىر. سول سەبەپتەن Amazon جانە Walmart جاعىنان باسەكەگە تۇسكەن جەرگىلىكتى كومپانيالاردىڭ مۇددەلەرىن قورعاۋى قاجەت. ەكىنشى جاعىنان وزگە دە سەرىكتەستەرىمەن، ەڭ الدىمەن شەتەل ينۆەستورلارىمەن دە قارىم-قاتىناستارىن بۇزىپ الماۋى قاجەت»، – دەدى Politico باسىلىمىنا.

زاڭگەردىڭ ايتۋىنشا، اق ءۇي باسشىسى دونالد ترامپ ءسۇت ونىمدەرى نەمەسە حارلي-دەۆيدسون موتوتسيكلدەرى سەكىلدى امەريكالىق تاۋارلاردىڭ باسەكەلەستىگىن قامتاماسىز ەتكىسى كەلەدى. ال ءوز كەزەگىندە ءۇندىستاندا داۋلەتى تومەن تۇرعىندارىنىڭ كوبىسى اۋىل شارۋاشىلىعىمەن اينالىسادى. سول سەبەپتى بۇل سالانىڭ ەلدە ورنى بولەك، ۇكىمەت ءسۇت وندىرۋشىلەردىڭ مۇددەلەرىن قورعايدى.

قازىرگى ۋاقىتتا دونالد ترامپ ءۇشىن سايلاۋ ناۋقانىنا قىزۋ دايىندىق باستالىپ ەتتى. ال تاياۋدا وتكەن سايلاۋدا جەڭىسكە جەتكەن نارەندرا مودي جاقتاستارىنىڭ مۇددەلەرىن قورعاۋعا بار كۇشىن سالماق. سوندىقتان، ەكى ەل اراسىنداعى ساۋدا تارتىسىنىڭ ۇزاققا سوزىلاتىن ءتۇرى بار.

"The Qazaq Times"