Foto: https://gdb.voanews.com

AQŞ pen Ündistan sauda soğısınıñ jaña kezeñine qadam bastı. Taraptar arasındağı tartıs Qwrama Ştattarınıñ Qıtaymen sauda soğısımen salıstırğanda, aytarlıqtay joğarı emes. Degenmen, resmi Uaşington N'yu-Delige birqatar ekonomikalıq şaralar qabıldap ülgerdi.

Mälimetter boyınşa, 2018 jılı Ündistan AQŞ-qa 80 milliard dollarğa tauar ekporttağan. Onıñ tek 5 milliardına baj salığı engizilmegen. Keyinnen AQŞ äkimşiligi osı elden jetkiziletin alyuminiy men qwrışqa baj salığın köterdi jäne sauda jeñildikteriniñ küşin joydı. Ündistan da qarsı şaralarğa köşip, AQŞ-tan importtalatın 28 tauarğa baj salığın arttırğan. Bwl şamamen 220 million dollarğa bağalanğan önimderge qatıstı.

Osığan qatıstı mälimdeme jasağan amerikalıq zañger Mansi Set: «AQŞ-pen qatınastarında Ündistan sauda märtebesiniñ özgerui nege äkeletinin oylanu kerek. Sonday-aq memlekettegi işki jağdaydı tüsinu de mañızdı. Qayta saylanğan prem'er Narendra Modi elde ekonomikalıq ösimdi qamtamasız etuge bar köñilin salıp otır. Sol sebepten Amazon jäne Walmart jağınan bäsekege tüsken jergilikti kompaniyalardıñ müddelerin qorğauı qajet. Ekinşi jağınan özge de seriktesterimen, eñ aldımen şetel investorlarımen de qarım-qatınastarın bwzıp almauı qajet», – dedi Politico basılımına.

Zañgerdiñ aytuınşa, Aq üy basşısı Donal'd Tramp süt önimderi nemese Harli-Devidson motociklderi sekildi amerikalıq tauarlardıñ bäsekelestigin qamtamasız etkisi keledi. Al öz kezeginde Ündistanda däuleti tömen twrğındarınıñ köbisi auıl şaruaşılığımen aynalısadı. Sol sebepti bwl salanıñ elde ornı bölek, ükimet süt öndiruşilerdiñ müddelerin qorğaydı.

Qazirgi uaqıtta Donal'd Tramp üşin saylau nauqanına qızu dayındıq bastalıp etti. Al tayauda ötken saylauda jeñiske jetken Narendra Modi jaqtastarınıñ müddelerin qorğauğa bar küşin salmaq. Sondıqtan, eki el arasındağı sauda tartısınıñ wzaqqa sozılatın türi bar.

"The Qazaq Times"