الماتىلىق پروكۋرور: سىزدەردىڭ ءىس-ارەكەتتەرىڭىز دۇرىس ەمەس

قالالىق قوعامدىق دامۋ باسقارماسىنىڭ باسشىسى ايدار ەسەنبەكوۆ  جانە ونىمەن ەرىپ كەلگەن پروكۋرور تاڭعى 10-نان بەرى «قىتاي ەكسپانسياسىنا قارسى» ءارى «ساياسي تۇتقىنداردى بوساتۋ» تۋرالى تالاپتار بويىنشا اكىمدىك الدىندا تۇرعان كوپشىلىكتىڭ تاراۋىن سۇراپ، «زاڭعا قايشى» جيىنعا ەسكەرتۋ جاسادى.  

بوستاندىق اۋدانىنىڭ پروكۋرورىنىڭ مىندەتىن اتقارۋشى باۋىرجان مولداجانوۆ تارامايتىنىن جانە توقاەۆ بەيبىت جيىنعا رۇقسات بەرگەنىن ايتقان نارازىلارعا قاراتا «ءبىز سىزدەردى تىڭدادىق. ءبىر-ءبىرىمىزدى تىڭدايىق. سىزدەردىڭ ءىس-ارەكەتتەرىڭىز دۇرىس ەمەس، زاڭعا قايشى بولىپ تۇر»، – دەدى. جينالعان بەلسەندىلەر كونستيتۋتسيالىق قۇقىعى بارىن العا تارتقانىنا قاراماستان پروكۋرور «رۇقسات ەتىلگەن» بەيبىت شەرۋ ءتارتىبىن بۇزعانىن مالىمدەدى. «بىزدىكى زاڭسىز ەمەس»، «سەندەر قاشان رۇقسات بەرىپ ەدىڭدەر»، «ديكتاتۋرالىق تۇسىندىرمە»، «قاماساڭدار قاماڭدار، تارامايمىز» دەگەن ازاماتتار وزدەرىنىڭ بارىنشا بەيبىت باعىتتى ۇستاناتىن ايتىپ، «بوستاندىق!» دەپ ۇرانداتىپ ايقايلادى.

ەستەرىڭىزگە سالا كەتەيىك، قىتايلىق بىرىككەن 55 جوبانىڭ قازاقستاندا سالىنۋىنا قارسى نارازىلىق اكتسيالارى تامىزدىڭ سوڭىنداعى جەكەلەگەن پيكەتتەردەن كەيىن كۇش الىپ ءۇش كۇننەن بەرى شەرۋ ءجۇرىپ جاتقان جاڭاوزەن جۇرتىنىڭ باستاماسىمەن بۇگىن وزگە 9 قالادا جالعاسىن تاپتى. بۇقارالىق سيپات العان ەستافەتالىق نارازىلىق اكتسيالارى استانا، الماتى، شىمكەنت، اقتوبە، اقتاۋ، وسكەمەن، قاراعاندى، كوكشەتاۋ، تاراز قالالارىندا ءارتۇرلى كولەمدە كورىنىس بەردى.

"The Qazaq Times"