بۇرىنعى ماڭعىستاۋ وبلىسى اكىمىنىڭ ءبىرىنشى ورىنباسارى قىزمەتىندەگى سەرىك امانعاليەۆ جەمقورلىق كۇدىگى بويىنشا جازاعا كەسىلدى. فوتو: obk.kz

بۇگىن، 27 تامىز ماڭعىستاۋ وبلىستىق مامانداندىرىلعان اۋدانارالىق قىلمىستىق سوت ىستەرىنىڭ سۋدياسى ايماق اكىمىنىڭ ورىنباسارى بولعان سەرىك امانعاليەۆكە قاتىستى جەمقورلىق ايىبى بويىنشا سوت ۇكىمىن شىعاردى.

"يناكتاۋ" وڭىرلىك اقپارات قىزمەتىنىڭ حابارلاۋىنشا، امانعاليەۆ وتكەن جىلدىڭ 3 قاراشاسىندا جەمقورلىققا قارسى ۇلتتىق بيۋرونىڭ قاتىسۋىمەن اقتاۋ حالىقارالىق اۋەجايىندا چەح قۇرىلىس كومپانياسىنان مۇز سارايىن سالۋ جوباسىنا بايلانىستى ۋادەلەسكەن 400 مىڭ ەۋرونىڭ 115 مىڭىن الۋ ۇستىندە قولعا تۇسكەن. 2017-2018 جىلدارى اكىم ورىنباسارى قىزمەتىندە بولعان ەكس-شەنەۋنىككە سوت قر قىلمىستىق كودەكسىنىڭ «اسا ءىرى كولەمدە پارا الۋ» 366-بابىنا ساي، 10 جىلعا باس بوستاندىعىنان ايىرۋ جازاسىن كەستى. سونىمەن قاتار، ول ءومىربويى مەملەكەتتىك قىزمەتتە لاۋازىمدى قىزمەت اتقارۋعا، مەملەكەتتىك ورگاندا جۇمىس ىستەۋگە جانە مەملەكەتتىڭ ۇلەسى بار كومپانيالاردا جانە ەكىنشى دەڭگەيلى بانكتەردە قىزمەت اتقارا المايدى. «قۇرمەت» مەملەكەتتىك ناگراداسىنان ايىرىلعان ەكس-ورىنباسار جازاسىن قاۋىپسىزدىگى تومەن كولونيادا وتەيتىن بولادى.

19 شىلدەدە سوتى باستالعان امانعاليەۆ 22-ءسى كۇنگى سوڭعى سوزىندە ءوزىنىڭ 35 جىلىن مەملەكەتكە قىزمەت ەتۋگە ارناعاندىعىن، وسى ۋاقىت ارالىعىندا العاش رەت جاڭىلىسقانىن جانە اسىراۋىندا قارت اتا-اناسى بار ەكەنىن العا تارتا وتىرىپ، سۋديادان «باس بوستاندىعىن شەكتەۋ جازاسىن قولدانباۋىن» سۇراپ، ايىپپۇل تۇرىندە جازالاۋىن ايتىپ ەدى.

"The Qazaq Times"