مەملەكەت باسشىسى قاسىم-جومارت توقاەۆ ۇلىتاۋداعى جوشى حان كەسەنەسىندە. 24 تامىز 2019 جىل. فوتو: اقوردا

24 تامىز «ۇلىتاۋ» ۇلتتىق تاريحي-مادەني جانە تابيعي مۇراجاي قورىعىندا وتكەن «ۇلىتاۋ 2019» حالىقارالىق تۋريستىك فورۋمىندا ەل پرەزيدەنتى قاسىم-جومارت توقاەۆ قازاقستانعا جۋىردا 9 ميلليونعا دەيىن تۋريست كەلە الاتىنىن مالىمدەدى.

اقوردا ءباسپاسوز قىزمەتىنىڭ حابارلاۋىنشا، پرەزيدەنت توقاەۆ «ءبىز سالالىق مەملەكەتتىك باعدارلامانى قابىلدادىق. ونى تولىق جۇزەگە اسىرۋ تۋريزم ۇلەسىن ءجىو-دەگى 8 پايىزعا دەيىن ارتتىرۋعا مۇمكىندىك بەرەدى. كەلۋشىلەردىڭ سانى 9 ميلليونعا دەيىن، ال ىشكى تۋريستەردىڭ سانى 8 ميلليونعا دەيىن ءوسۋى ءتيىس. وسى سالادا جۇمىس ىستەيتىن ادامداردىڭ سانىن 650 مىڭ ادامعا جەتكىزۋ كەرەك»، – دەگەن twitter  پاراقشاسىندا.

فورۋمدا سويلەگەن سوزىندە مەملەكەت باسشىسى «ۇلىتاۋ – حالىقارالىق دەڭگەيدەگى ەتنوگرافيالىق ءتۋريزمنىڭ ورتالىعى بولۋى ءتيىس»، – دەدى. سونداي-اق جوشى حاننىڭ كەسەنەسىن ەتنومادەني تۋرنىسانعا اينالدىرۋ قاجەتتىگىن ايتقان پرەزيدەنت بىرقاتار ءوز ۇسىنىستارىمەن ءبولىستى.

– كوپتەگەن شەتەلدىك تۋريستەردى بەس جۇلدىزدى قوناقۇيلەر، كۋرورتتار سياقتى امبەباپ دۇنيەلەر جالىقتىردى. ولاردى ءارتۇرلى حالىقتاردىڭ مادەنيەتىن، ادەت-عۇرپى مەن سالت-ءداستۇرىن زەرتتەۋ، بارعان ەلدىڭ تاريحىمەن تانىسۋ قىزىقتىرادى. سوندىقتان، الەمدە وزىندىك ەرەكشەلىگى بار جەرلەرگە بارۋعا، تاريحي فەستيۆالدارعا جانە كونە ءارى قايتا قالپىنا كەلتىرىلگەن ماڭىزدى وقيعالارعا قاتىسۋعا دەگەن سۇرانىس ارتىپ وتىر. ءبىز وسىنداي ۇردىستەردى پايدالانۋىمىز قاجەت. قازاقستاننىڭ الەمگە ۇسىناتىن بىرەگەي ورىندارى بار، – دەدى ول.

قازىرگى تاڭدا رەسپۋبليكا بويىنشا «قر-داعى تۋريستىك قىزمەت تۋرالى» زاڭى اياسىندا  512 تۋراگەنتتىك جۇمىس جاسايدى. الەمنىڭ كوپتەگەن ەلدەرىنىڭ دامۋ ۆەكتورىنا اينالعان تۋريزم يندۋسترياسى بىزدە ءالى جۇيەلەنىپ، جولعا قويىلماعاندىعى بەلگىلى. توقاەۆ توعىزىنشى تەرريتوريانىڭ  تۋريستىك الەۋەتى مەن ونى دامىتۋدىڭ مىندەتتەرى تۋرالى ايتا وتىرىپ، سالالىق كاسىبي كادرلاردى دايارلاۋدىڭ ماڭىزدىلىعىن ءسوز ەتتى.

– تۋريزم – وتە كۇردەلى سالا. ءتيىستى مامانداردى دايىنداۋىمىز كەرەك. سوندىقتان تۋريزم ۋنيۆەرسيتەتىن اشۋ جونىندە شەشىم قابىلدادىق. ءدال وسى سالادا جۇمىس ىستەي الاتىن بىلىكتى كادرلاردى دايىنداۋىمىز قاجەت، – دەدى پرەزيدەنت.

ەلىمىزدە  ەرەكشە قورعاۋعا الىنعان تابيعي تەرريتوريالارى رەسپۋبليكانىڭ 9 % اۋماعىن، ياعني 24,7 ميلليون. گەكتاردى قامتيدى. اتالمىش تابيعي رەسۋرستار قورىن ساقتاۋ-قورعاۋعا الىنعان ايماقتا 13 ۇلتتىق پارك كەشەندەرى بار. ولاردىڭ قىزمەتى ءتيىستى زاڭ نەگىزىندە  ىسكە اسىرىلادى. ستاتيستيكالىق مالىمەت بويىنشا، ۇلتتىق پاركتەردە جىل سايىن دەمالاتىن تۋريستەر سانى شامامەن 8% قۇرايدى. 2018 جىلعى مالىمەت بويىنشا 1,3 ميلليون حالىق دەمالىسىن ۇلتتىق پاركتەردە وتكىزگەن.

«ۇلىتاۋ 2019» حالىقارالىق تۋريستىك فورۋمىندا ەل پرەزيدەنتى قاسىم-جومارت توقاەۆ مالىمدەمە جاساۋدا. 24 تامىز 2019 جىل. فوتو: اقوردا

حالىقارالىق فورۋمعا قاتىسۋشى شەتەلدىك قوناقتار. 24 تامىز 2019 جىل. فوتو: اقوردا

«ۇلىتاۋ 2019» حالىقارالىق تۋريستىك فورۋمىندا ەل پرەزيدەنتى ق.توقاەۆ وتاندىق تۋريزم يندۋسترياسىنا قاتىستى ماسەلەلەر تۋرالى ايتتى. 24 تامىز 2019 جىل. فوتو: اقوردا

فورۋمعا الىس-جاقىننان كەلگەن ءار ءتۇرلى ۇيىمداردىڭ وكىلدەرى. 24 تامىز 2019 جىل. فوتو: اقوردا

پرەزيدەنت ق.توقاەۆ پەن فورۋم قاتىسۋشىلارى شارانىڭ سوڭىندا. 24 تامىز 2019 جىل. فوتو: اقوردا

"The Qazaq Times"