وتكەن ونكۇندىكتە الەۋمەتتىك جەلىلەردە قحر بيلىگىنىڭ قولداۋىمەن گونكونگتاعى نارازىلارعا قارسى كەلىسىلگەن جىمىسقى اقپاراتتىق ناۋقان جۇرگىزىلگەن. بۇعان كوز جەتكىزگەن YouTube, Twitter جانە Facebook جەلىلەرى پروپاگاندالىق شابۋىل ايلا-شارعىنىڭ جولىن كەسۋ امالدارىن قابىلداپ، جۇيە ساياساتىنا وزگەرىستەر ەنگىزۋدە.
YouTube ۆيدەوحوستينگنىڭ سايت اكىمشىلىگى گونكونگتاعى ەرەۋىلشىلەرگە «ىقپال ەتۋ ارەكەتتەرىنىڭ ناۋقانى» بايقالادى دەگەن كۇدىكپەن 210 ارنانى بۇعاتتادى. Reuters اقپارات اگەنتتىگى وپەراتسيا تەك YouTube-تە عانا جۇرگىزىلمەگەن، وسى اپتادا Twitter جانە Facebook الەۋمەتتىك جەلىلەرىنىڭ وكىلدەرى كوپتەگەن اككاۋنتتاردىڭ بۇعاتتالعاندىعى تۋرالى حابارلاعانىن ايتادى. الەۋمەتتىك جەلىلەردە بۇل ناۋقاندى بەيجىڭ تاپسىرىسىمەن ىسكە اسىرىلعان دەپ سانايدى.
YouTube قۇرامىنا كىرەتىن Google قاۋىپسىزدىك قىزمەتى باسشىلارىنىڭ ءبىرى شەين حانتلي بارلىق ءۇش الەۋمەتتىك جەلىلەردەگى ناۋقاندى «قىتايمەن بايلانىستى» ادامدار توبى وتكىزگەنىن مالىمدەدى.
دۇيسەنبىدە تۆيتتەر مەن Facebook گونكونگتاعى نارازىلىق اكتسيالارىن توقتاتۋعا باعىتتالعان ناۋقانعا قاتىسقان اككاۋنتتاردىڭ جويىلاتىنى تۋرالى حابارلادى. الەۋمەتتىك جەلىلەر وكىلدەرىنىڭ ايتۋىنشا، ناۋقان قىتاي بيلىگىنىڭ قولداۋىمەن وتكىزىلدى.
Twitter, Facebook جانە YouTube قىتايدا بۇعاتتالعان، بىراق بۇل شەكتەۋلەر گونكونگقا قولدانىلمايدى.
بىرنەشە كۇن بۇرىن الەۋمەتتىك جەلى پايدالانۋشىلارى قىتايلىق مەملەكەتتىك تەلەارنالار شىعارعان جارنامالىق روليكتەردىڭ جاپپاي تارالۋىن بايقاعان ەكەن. اكتيۆتى كورسەتىلىم قاتارىنا ورنالاستىرىلعان بارلىق بەينەروليكتەر گونكونگتاعى نارازىلىققا قارسى ماندە جاسالعان.
ناتيجەسىندە، دۇيسەنبىدە تۆيتتەر باسشىلىعى ءوزىنىڭ جارناما ساياساتىنداعى باستى وزگەرىسپەن ءبولىستى: الەۋمەتتىك جەلىدە بۇدان بىلاي مەملەكەتتىك باق-تىڭ مەديونىمدەرى جاريالانبايتىن بولادى. ال Facebook جانە YouTube ءالى دە جارنامالاردى ورنالاستىرۋ ەرەجەلەرىن وزگەرتۋدى جايىندا مالىمدەمە جاساي قويعان جوق.
YouTube قىتايلىق مەملەكەتتىك باق-تارعا تيەسىلى اككاۋنتتاردى باقىلاۋدى قاتايتۋعا ۋادە بەردى يننوۆاتسيالار تۋرالى تولىق اقپارات ازىرگە جاريالانعان جوق. ەندى YouTube-تە سينحۋا مەملەكەتتىك اگەنتتىگى، CCTV جانە CGTN تەلەارنالارىنىڭ كەز كەلگەن بەينەونىمى اۋديتورياعا باق-تاردى قحر ۇكىمەتى باقىلايتىندىعى تۋرالى ەسكەرتۋلەرمەن بىرگە جاريالايدى. الايدا، قىتايعا قارايتىن بىرقاتار مەملەكەتتىك باسىلىمدار، سونىڭ ىشىندە People Daily, China Daily جانە Global Times بۇل تالاپتان بوساتىلعان.
بيىلعى جاز گونكونگ ءۇشىن تاريحتاعى ەڭ اۋقىمدى پروتەستىك ماۋسىم بولدى. فوتو: WALLACE / AFP
ەستەرىڭىزگە سالا كەتەيىك، بەيجىڭ كەڭسەسىنىڭ «وتپەن ويناماڭدار، قاتەرلى دەڭگەيگە جەتتىڭدەر» دەپ دوق كورسەتۋىنە، گوكونگ ۇكىمەتىنىڭ ەسكەرتۋى مەن پوليتسيا ءىس-قيمىلدارىنا قاراماستان نارازىلىقتاردىڭ ۇزدىكسىز ءجۇرىپ جاتقانىنا ءۇش ايعا تايادى. قارسىلىق شارالارىنىڭ باستى ءۋاجى – «تۇتقىنداردى قىتايعا ەكستراديتسيالاۋ تۋرالى» زاڭ جوباسىن قابىلداماۋ، شەرۋلەردە ۇستالعانداردى بوساتۋ، كۇش قولدانعان پوليتسيا قىزمەتكەرلەرىن جازالانۋ مەن ەل باسشىسى كەرري لامنىڭ وتستاۆكاعا كەتۋى تالاپتارى. ءتىپتى، كەيبىر دەمونسترانتتار گونكونگ اۆتونومدى ايماعىنىڭ 2047 جىلى قحر قۇرامىنا تولىقتاي وتۋىنە قارسى، بەيجىڭنەن ەلدىڭ تاۋەلسىزدىگىن تانىپ-مويىنداۋىن سۇراۋدا. وسى ۋاقىتقا دەيىن ۇلىبريتانيا، اقش، تايۆان ت.ب. مەملەكەتتەر نارازىلاردىڭ جاعىندا ەكەنىن مالىمدەگەن ەدى. ءتىپتى كانادا بيلىگى ءوز قىزمەتكەرلەرىنە قىتايعا ساپار-ساياحاتقا بارماۋعا ۇندەدى.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟