گونكونگ تۇرعىندارى ونىنشى اپتا ەرەۋىلگە شىقتى

گونكونگ تۇرعىندارى بەيجىڭ شەشىمىنە قارسى كەزەكتى مارتە ەرەۋىلگە شىقتى. ەرەۋىلدىڭ ونىنشى اپتاسىندا نارازىلار مەترو، اۋەجايعا جينالعان.

مەتروعا جينالعان جۇرتتى پوليتسيا تاياقتاپ قۋىپ، كوز جاساۋراتاتىن گاز قولدانعان. كۋاگەرلەردىڭ ايتۋىنشا ءتىپتى رەزەڭكە وق اتىلعان. دەگەنمەن، حالىقارالىق اگەنتتىكتەر جاريالاعان دالەلدى ۆيدەولارعا قاراماستان پوليتسيا ايىپتاردى مويىنداماي وتىر.

گونكونگتە اپتا سايىن جالعاسىن تاپقان حالىق شەرۋلەرىن بۇۇ وكىلدەرى، شەتەلدىك اگەنتتىكتەر باقىلاپ وتىر. «بۇۇ گونكونگ اكىمشىلىگى اۋماعىنداعى ەرەۋىلدەرگە الاڭداۋشىلىق ءبىلدىرىپ وتىر. سەبەبى قولدا بار ماتەريالدارعا قاراپ ءتارتىپ ساقشىلارى نارازى حالىقتى تارقاتۋ ءۇشىن حالىقارالىق نورماعا ساي كەلمەيتىن قۇرالداردى قولدانعانىن كوردىك. سونداي-اق، جابىق نىساندا كوز جاساۋراتاتىن گاز شاشقان. بۇل ادام ومىرىنە قاۋىپ توندىرەتىن جاعداي. گونكونگ بيلىگىنەن تۇرعىندارعا قارسى كۇش قولدانباۋدى تالاپ ەتەمىز. پوليتسيا بۇل ارەكەتىمەن ەرەۋىلشىلەردى ودان سايىن ىزالاندىرا تۇسەدى. ماسەلەنى كۇشپەن شەشۋدىڭ قاجەتى جوق»، – دەيدى بۇۇ-نىڭ ادام قۇقىعى بويىنشا وكىلى رۋپەرت كولۆيلل

Reuters اگەنتتىگىنە سۇحبات بەرگەن ەرەۋىلشىلەردىڭ ءبىرى: «نارازىلىق اكتسيالارى كەزىندە، پوليتسيا قىزمەتكەرلەرى قۇقىعىمىزدى تاپتاپ جاتىر. حالىققا كۇش قولدانۋدا. گيتلەردىڭ رەجيمى دەر ەدىم مۇنى. مەتروداعى ەرەۋىل كەزىندە كوزگە گاز شاشتى. ونسىزدا اۋاسى تار جەر، قۇددى گاز كامەراسىنا اينالعانداي. ەسكالاتوردان تۇسپەك بولعانداردى ساباعانى تاعى بار. ءبىز تاۋەلسىز كوميتەت قۇرىلىپ، پوليتسياعا قارسى تەرگەۋ جۇرگىزۋىن تالاپ ەتەمىز. بارىپ تۇرعان ايۋاندىق بۇل. حالىقتا ءسوز بوستاندىعى بارىن ۇمىتپاۋ كەرەك»، – دەيدى.

گونكونگتەگى جاپپاي نارازىلىق شەرۋلەرى ماۋسىمدا باستالعان. 16 ماۋسىمدا 2 ميلليونعا جۋىق ادام نارازىلىق شەرۋىنە شىققان ەدى. بۇل ەل تاريحىندا بولماعان ماسسالىق نارازىلىق اكتسياسى. وسى سىندى اۋقىمدى نارازىلىق شەرۋى گونكونگتە 1997 جىلدان بەرى بولعان ەمەس. سول تۇستا بريتانيا ۇكىمەتى گونكونگتى قىتاي ۇكىمەتىنىڭ ايرىقشا باسقارۋ تارتىبىنە وتكەرىپ بەرگەن بولاتىن. بۇعان نارازى ءجۇز مىڭداعان ادام كوشەگە شىعىپ، قحر بيلىگىن قابىلداۋعا قارسى نارازىلىق بىلدىرگەن. گونكونگتا جەرگىلىكتى اكىمشىلىك باسشىسى كەرري لام زاڭ جوباسىن كۇن تارتىبىنەن الىپ تاستاۋ تۋرالى شەشىم قابىلدادى، بىراق بۇل ۇكىمەتكە قارسى نارازىلىق تولقىنىن توقتاتپادى. وسى رەتتە گونكونگ مەرى كەرري ليم: «بۇرىنعى اشىق، ەركىن، ەكونوميكالىق قۋاتتى، تۇراقتىلىق بار شاھاردان تۇك قالمادى ما دەپ قورقامىن. قايتا قالىپقا كەلۋ ءۇشىن ءبىراز ۋاقىت كەرەك. ەرەۋىلشىلەر اۋەجاي جۇمىسىن توقتاتىپ، مەترودا قاقتىعىسقا شىقتى، پوليتسيا ۋچاسكەلەرىنە دە شابۋىل جاساپ الاساپىران تۋعىزدى. ەرەۋىلشىلەر ءبىر مەزگىل ويلانىپ، جان-جاعىنا قاراسا ەكەن دەيمىن. ويلانباي جاساعان قادامدارى، قالاعا قانشالىقتى زيان كەلتىردى»، – دەپ مالىمدەدى.

"The Qazaq Times"