گونكونگ تۇرعىندارى وپپوزيتسيا وكىلدەرىنىڭ جەڭىسىن تويلاعان ءسات. فوتو: NYTimes

گونكونگتىڭ 18 ايماعىندا وتكەن سايلاۋدا وپپوزيتسيا وكىلدەرى ايقىن جەڭىسكە جەتتى. The New York Times مالىمەتىنشە، داۋىستاردى الدىن-الا ساناۋ ناتيجەلەرى بويىنشا دەموكراتيا ءۇشىن كۇرەس جۇرگىزگەن توپ ياعني وپپوزيتسيا وكىلدەرى 452 ورىننىڭ 396-ىنا يە بولعان (شامامەن 90%).

وسىعان دەيىن اۋداندىق كەڭەستەردەگى ورىنداردىڭ 75% داۋىسقا يە بولعان ۇكىمەتشىل توپ بۇرىن-سوڭدى بولماعان جەڭىلىسكە ۇشىرادى. بۇل جولى سايلاۋدا 600-دەن استام سايلاۋ ۋچاسكەلەرى جۇمىس ىستەدى،1090 كانديدات قاتىستى. تىركەلگەن 4,1 ميلليون سايلاۋشىنىڭ 2,94 ميلليوننان استامى داۋىس بەرۋگە كەلدىناتيجەلەرى بويىنشا دەموكراتيا جاقتاستارى 452 ورىننىڭ 396-ىنا يە بولدى (شامامەن 90%). سايلاۋدا ءتارتىپبۇزۋشىلاردى ۇستاۋ ءۇشىن 31 000 پوليتسيا جۇمىلدىرىلعان. بىراق نارازىلىق بىلدىرۋشىلەر بۇل جولى كوشەلەردە ميتينگ ۇيىمداستىرعان جوق.

گونكونگ شاھارىنداعى نارازىلىق شارالارى باستاپقىدا گونكونگتىك ازاماتتاردى ەكستراديتسيالاۋ تۋرالى زاڭ جوباسىنا قارسىلىقتان باستالعانىمەن، سوڭعى كەزدەرى نارازى توپ گونكونگ قالاسىنىڭ دەربەستىگى تۋرالى دا ۇراندار كوتەرە باستادى. 16 ماۋسىمدا 2 ميلليونعا جۋىق ادام نارازىلىق شەرۋىنە شىققان ەدى. بۇل ەل تاريحىندا بولماعان ماسسالىق نارازىلىق اكتسياسى. وسى سىندى اۋقىمدى نارازىلىق شەرۋى گونكونگتە 1997 جىلدان بەرى بولعان ەمەس. سول تۇستا بريتانيا ۇكىمەتى گونكونگتى قىتاي ۇكىمەتىنىڭ ايرىقشا باسقارۋ تارتىبىنە وتكەرىپ بەرگەن بولاتىن. بۇعان نارازى ءجۇز مىڭداعان ادام كوشەگە شىعىپ، قحر بيلىگىن قابىلداۋعا قارسى نارازىلىق بىلدىرگەن. گونكونگتا جەرگىلىكتى اكىمشىلىك باسشىسى كەرري لام زاڭ جوباسىن كۇن تارتىبىنەن الىپ تاستاۋ تۋرالى شەشىم قابىلدادى، بىراق بۇل ۇكىمەتكە قارسى نارازىلىق تولقىنىن توقتاتپادى.

قازىرگى ۋاقىتتا گونكونگتە اپتا سايىن جالعاسىن تاپقان حالىق شەرۋلەرىن بۇۇ وكىلدەرى، شەتەلدىك اگەنتتىكتەر باقىلاپ وتىر. بۇۇ-نىڭ ادام قۇقىعى بويىنشا وكىلى رۋپەرت كولۆيلل: «بۇۇ گونكونگ اكىمشىلىگى اۋماعىنداعى ەرەۋىلدەرگە الاڭداۋشىلىق ءبىلدىرىپ وتىر. سەبەبى قولدا بار ماتەريالدارعا قاراپ ءتارتىپ ساقشىلارى نارازى حالىقتى تارقاتۋ ءۇشىن حالىقارالىق نورماعا ساي كەلمەيتىن قۇرالداردى قولدانعانىن كوردىك. سونداي-اق، جابىق نىساندا كوز جاساۋراتاتىن گاز شاشقان. بۇل ادام ومىرىنە قاۋىپ توندىرەتىن جاعداي. گونكونگ بيلىگىنەن تۇرعىندارعا قارسى كۇش قولدانباۋدى تالاپ ەتەمىز. پوليتسيا بۇل ارەكەتىمەن ەرەۋىلشىلەردى ودان سايىن ىزالاندىرا تۇسەدى. ماسەلەنى كۇشپەن شەشۋدىڭ قاجەتى جوق»، – دەيدى.

"The Qazaq Times"