ومىربەك بابانوۆ قىرعىزستانعا قايتىپ ورالدى.

جەرگىلىكتى باق وكىلدەرىنىڭ مالىمەتىنشە، تامىز ايىنىڭ 8-ءى كۇنى «رەسپۋبليكا» پارتياسىنىڭ كوشباسشىسى ومىربەك بابانوۆ بىشكەك قالاسىنا كەلگەن. ءدال وسى كۇنى ونىڭ پارتيالاستارى مەملەكەت باسشىسى سوورونباي جەەنبەكوۆ پەن ەكس-پرەزيدەنت المازبەك اتامباەۆتى ماسەلەنى بەيبىت جولمەن، زاڭ اياسىندا شەشۋگە شاقىرعان.

ومىربەك بابانوۆ 2017 جىلى سايلاۋعا قاتىسىپ، قازىرگى پرەزيدەنت سوورونباي جەەنبەكوۆتان جەڭىلگەن. سايلاۋ ناۋقانى كەزىندە سول كەزدەگى مەملەكەت باسشىسى المازبەك اتامباەۆ ونى قازاقستان پرەزيدەنتى نۇرسۇلتان نازارباەۆپەن كەزدەسكەنى ءۇشىن «كورشى ەلدىڭ قۇيىرشىعى» دەپ اتاپ، اقوردانى «ءبىزدىڭ ىشكى ىسىمىزگە ارالاستى» دەپ ايىپتاعان. سايلاۋدان كەيىن بابانوۆ ساياسي مانسابىن اياقتايتىنىن ايتىپ، ەلدەن كەتكەن. وسى ۋاقىتقا دەيىن ول ماسكەۋ قالاسىندا بولعان.

تامىز ايىنىڭ 7-ىنەن بەرى قىرعىز ەلىندە ساياسي ءومىر قىزىپ تۇر. ءدال وسى كۇنى ىشكى ىستەر مينيسترلىگى مەن ۇلتتىق قاۋىپسىزدىك كوميتەتى بۇرىنعا پرەزيدەنتى المازبەك اتامباەۆتى ۇستاۋعا بايلانىستى قوي-تاش اۋىلىندا ارنايى وپەراتسيا وتكىزگەن. وپەراتسيا بارىسىندا ءبىر سارباز كوز جۇمىپ، 45 ادام جاراقات العان. 8-ءشى تامىز كۇنى قوي-تاشتا ارنايى وپەراتسيا قايتادان جالعاسىپ، اتامباەۆ ءوز ەركىمەن كۇشتىك قۇرىلىمدارعا بەرىلگەن.

قازىرگى ۋاقىتتا المازبەك اتامباەۆقا جەمقورلىق بابى بويىنشا ايىپ تاعىلىپ، ۋاقىتشا ۇستاۋ يزولياتورىنا قامالعان.

"The Qazaq Times"