فوتو: AP

قىرعىزستاننىڭ بۇرىنعى پرەزيدەنتى المازبەك اتامباەۆ ارنايى جاساققا قارسى وق اتقانىن راستادى.

7 تامىزدا وتكەن ەكس-پرەزيدەنتتى ۇستاۋ وپەراتسياسى كەزىندە ەكى تاراپ ءبىر-بىرىنە وق جاۋدىرعان. وقيعادان كەيىن مالىمدەمە جاساعان اتامباەۆ: «مەنىڭ جاقتاستارىمدا قارۋ-جاراق بولعان جوق. سول سەبەپتى ءوزىم وق اتتىم»، – دەپ مالىمدەدى. قازىرگى بيلىكتىڭ «قاتىگەزدىگىنە تاڭقالاتىنىن» جەتكىزگەن اتامباەۆ ارنايى وپەراتسيا بارىسىندا قولعا تۇسكەندەرگە كومەك قولىن سوزۋعا دايىن ەكەندىگىن دە ايتتى.

قىرعىزستاننىڭ بۇرىنعى پرەزيدەنتىنىڭ قوي-تاشتاعى ۇيىندە بولعان وپەراتسيا كەزىندە ارنايى جاساق وكىلى قازا تاۋىپ، 45 ادام اۋرۋحاناعا تۇسكەن. وسىعان بايلانىستى پىكىر بىلدىرگەن سوورونباي جەەنبەكوۆ: «المازبەك اتامباەۆ زاڭدى تەرگەۋ جۇمىستارىنا قارۋلى قاقتىعىس كورسەتۋ ارقىلى كونستيتۋتسيا مەن زاڭدى تابانىنا تاپتادى. قىرعىزستان قۇقىقتىق مەملەكەت. بيلىكتىڭ باستى مىندەتى ءار ازاماتتىڭ زاڭدى ورىنداۋىن قامتاماسىز ەتۋ»، – دەدى.

"The Qazaq Times"