ۇقك قاۋىپسىزدىك سەرتيفيكاتىن قاسىم-جومارت توقاەۆتىڭ تاپسىرماسى بويىنشا سىناقتان وتكىزدى.

پرەزيدەنت قاسىم-جومارت توقاەۆ تامىز ايىنىڭ 6-ى كۇنى Twitter پاراقشاسىندا قاۋىپسىزدىك سەرتيفيكاتىنا بايلانىستى پىكىر ءبىلدىردى. وندا ول ۇلتتىق قاۋىپسىزدىك كوميتەتى «Qaznet Trust Network» قاۋىپسىزدىك سەرتيفيكاتىن ءوزىنىڭ تاپسىرماسى بويىنشا سىناقتان ءساتتى وتكىزگەندىگىن حابارلادى.

ءدال وسى كۇنى ۇقك قاۋىپسىزدىك سەرتيفيكاتىن سىناقتان ءساتتى وتكىزگەندىگىن، الداعى ۋاقىتتا «كيبەرشابۋىل بولعان جاعدايدا» پايدالاناتىنىن ايتىپ، مالىمدەمە تاراتتى.

شىلدە ايىنان باستاپ قازاقستاندىقتار ۇيالى بايلانىس وپەراتورلارىنان عالامتورعا كەدەرگىسىز كىرۋ ءۇشىن قاۋىپسىزدىك سەرتيفيكاتىن ورناتۋدى ۇسىنعان سمس حاتتار الا باستاعان. ساراپشىلار مەن ازاماتتىق بەلسەندىلەر بۇنى «ازاماتتاردىڭ جەكە ومىرىنە قول سۇعۋ»، «حالىقتى باقىلاۋدا ۇستاۋدىڭ كەزەكتى قادامى» دەگەن پىكىرلەر ايتقان. ال ۇيالى بايلانىس وپەراتورلارى مەن بيلىك بۇنى «كيبەرشابۋىلدىڭ الدىن الۋ شاراسى» دەپ تۇسىندىرگەن.

وسىدان بىرنەشە كۇنى بۇرىن قاۋىپسىزدىك سەرتيفيكاتىنا بايلانىستى الماتى جانە نۇر-سۇلتان قالالارىندا قارسىلىق اكتسيالارى وتكەن.

"The Qazaq Times"