ۇقك قىزمەتىنەن بوساتىلدى دەگەن سامات ءابىشتىڭ ەڭبەك دەمالىسىندا ەكەنىن مالىمدەدى

6 قاڭتاردا كەي تەلەگرام-ارنالار ۇقك توراعاسىنىڭ ءبىرىنشى ورىنباسارى سامات ءابىشتىڭ ۇستالعانىن حابارلاپ، ارتىنشا اقپاراتتى جوققا شىعارعان.

"كەلىپ تۇسكەن سۇراۋلارعا سايكەس، ۇقك توراعاسىنىڭ ءبىرىنشى ورىنباسارى سامات ءابىش ءوز قىزمەتىندە ەكەنىن حابارلايمىز. قازىرگى ۋاقىتتا ول جىل سايىنعى دەمالىسىندا" دەلىنگەن ۇقك حابارلاماسىندا.

ەلدەگى قايعىلى وقيعالاردان كەيىن ۇقك باسشىلىعى وزگەرگەندە سامات ءابىش تۋرالى ەشتەڭە ايتىلماعان، تەك كوميتەت توراعاسىنىڭ ورىنباسارى قىزمەتىنە جاڭا ورىنباساردىڭ تاعايىندالعانى ايتىلعان. ۇقك-نىڭ رەسمي سايتىندا سامات ءابىش ۇقك توراعاسىنىڭ ءبىرىنشى ورىنباسارى دەپ كورسەتىلگەن.

ەلدە پرەزيدەنت قاسىم-جومارت توقاەۆتىڭ بيلىگى كۇشەيىپ، ءبىرىنشى پرەزيدەنت نۇرسۇلتان نازارباەۆتىڭ بيلىگى "السىرەدى" دەگەن بولجام كەڭىنەن تاراي باستاعان شاقتا نازارباەۆ پەن جاقىندارىنىڭ كورىنبەي كەتكەنى جايلى اقپاراتتار جيىلەگەن. كەيىنگى كەزدە جوعارعى بيلىكتە وتىرعان نازارباەۆتىڭ تۋىستارىنىڭ كوبى "دەمالىستا" نەمەسە "دەنساۋلىعىنا بايلانىستى جۇمىسىنا كەلمەگەنى" جايلى اقپاراتتار ءجيى شىعىپ جاتىر.

ەكس-پرەزيدەنتتىڭ ۇلكەن قىزى، ءماجىلىس دەپۋتاتى داريعا نازارباەۆا پارلامەنتتىڭ بىرنەشە وتىرىسىنا قاتىسپاعان. كومەكشىلەرى ونىڭ كوروناۆيرۋسپەن اۋىرىپ جاتقانىن حابارلادى.

بۇعان دەيىن اقپارات قۇرالدارى ەكس-پرەزيدەنتتىڭ ءىنىسى بولات نازارباەۆتىڭ قازاق-قىرعىز شەكاراسىنان وتكەنى، ماناس اۋەجايى ارقىلى دۋبايعا ۇشىپ كەتكەنىن جازعان. بىراق تۋىس-جاقىندارى دا، قازاقستان بيلىگى دە بۇل اقپاراتتى راستاعان دا، تەرىستەگەن دە جوق.

وسىعان دەيىن جۋرناليست اركادي دۋبنوۆ Facebook-تەگى پاراقشاسىندا نازارباەۆتىڭ تاعى ءبىر نەمەرە ءىنىسى قايرات ساتىبالدىنىڭ دۋبايدا ۇستالعانىن، ال ەكس-پرەزيدەنتتىڭ ءوزى قىتايدا ەكەنىن جازعان. بىراق بۇل اقپارات رەسمي تۇردە راستالعان جوق.

نۇرسۇلتان نازارباەۆتىڭ ءوزى جۇرت الدىنا 2021 جىلدىڭ 28 جەلتوقسانىنان بەرى شىقپاعان. ادەتتە ەلدەگى ماڭىزدى ماسەلەلەرگە پىكىرىن ايتىپ وتىراتىن نازارباەۆ قاڭتارداعى وقيعاعا بايلانىستى پىكىرىن بىلدىرگەن جوق. وسىعان دەيىن بۇرىنعى پرەزيدەنتتىڭ ءباسپاسوز حاتشىسى ايدوس ۇكىباي نۇرسۇلتان نازارباەۆتىڭ قازاقستاننان كەتپەگەنىن، استانادا ەكەنىن ايتقان. ونىڭ ايتۋىنشا، نازارباەۆ "بىرقاتار كونسۋلتاتيۆتىك كەزدەسۋلەر وتكىزىپ، پرەزيدەنت قاسىم-جومارت توقاەۆپەن تىكەلەي بايلانىستا وتىر".

قازاقستاندا 2 قاڭتاردا باستالعان نارازىلىق شارالارى شامامەن ءبىر اپتاعا سوزىلدى. وعان سۇيىتىلعان گازدىڭ قىمباتتاۋى سەبەپ بولعان. نارازىلار وزگە تالاپتارمەن بىرگە وتستاۆكاعا كەتسە دە، ساياسي ىقپالىن ساقتاپ قالعان 81 جاستاعى نۇرسۇلتان نازارباەۆتىڭ بيلىكتەن تولىق كەتۋىن دە تالاپ ەتكەن.

نارازىلىقتىڭ سوڭى قازاقستاننىڭ تاۋەلسىزدىك تاريحىندا بۇرىن-سوڭدى بولماعان ءىرى تارتىپسىزدىككە ۇلاستى. جۇزدەگەن ادام ۇكىمەت عيماراتتارىنا بارىپ كىرىپ، كەيبىرى ورتەندى. ساۋدا جانە قىزمەت كورسەتۋ ورىندارى تونالدى. كولىكتەر اۋدارىلدى.

پرەزيدەنت قاسىم-جومارت توقاەۆ ەلدە توتەنشە جاعداي ەنگىزگەن. بيلىك تارتىپسىزدىكتى ۇيىمداستىرۋشىلاردىڭ ارتىندا "حالىقارالىق تەرروريستەر بانداسى تۇر" دەپ مالىمدەدى. توقاەۆ ۇقشۇ-دان اسكەري كومەك سۇراپ، ىزىنشە ەلگە ۇقشۇ-نىڭ بىرنەشە مىڭ سولداتى كىردى (13 قاڭتاردان باستاپ ۇقشۇ اسكەرىنىڭ شىعارىلا باستايتىنى حابارلانعان). ساراپشىلار نازارباەۆ جاقتاستارىمەن تەكەتىرەس ۋشىققان شاقتا ۇقشۇ اسكەرىنىڭ ارقاسىندا توقاەۆ بيلىكتى ۋىسىندا ساقتاپ قالدى دەپ سانايدى.