«ەۋروپانىڭ سوڭعى ديكتاتورى» پارلامەنت سايلاۋىنىڭ ۋاقىتىن بەلگىلەدى

بەلارۋس ەلىندە پارلامەنت سايلاۋى قاشان وتەتىنى بەلگىلى بولدى.

بەلارۋس پرەزيدەنتى الەكساندر لۋكاشەنكو مەرزىمىنەن بۇرىن وتەتىن پارلامەنت سايلاۋىنىڭ ۋاقىتىن بەلگىلەدى. مەملەكەت باشىسىنىڭ جارلىعى بويىنشا، رەسپۋبليكالىق كەڭەس سايلاۋى قاراشا ايىنىڭ 7-ءى كۇنى، ال ۇلتتىق كەڭەس وكىلدەرىنىڭ سايلاۋى 17-ءى كۇنى وتەتىن بولدى.

بەلارۋس ەلىندە كەزەكتەن تىس پارلامەنت سايلاۋىنىڭ بيىل وتەتىندىگى ءساۋىر ايىندا بەلگىلى بولعان. بۇل جونىندە الەكساندر لۋكاشكەنو حالىققا جولداۋىندا مالىمدەگەن. قازىرگى پارلامەنتتىڭ مەرزىمى زاڭ بويىنشا 2020 جىلى اياقتالۋى ءتيىس. ءدال وسى جىلى پرەزيدەنتتىڭ دە مەرزىمى اياقتالادى. بۇعان دەيىنگى پارلامەنت سايلاۋى 2016 جىلى كۇزدە بولعان.

ايتا كەتەتىن ءبىر جايت، قازاقستاندا دا سوڭعى ۋاقىتتارى جۋرناليستەر مەن ساراپشالار اراسىندا كەزەكتەن تىس پارلامەنت سايلاۋى جونىندە قىزۋ تالقىلاۋلار جۇرۋدە. جاقىندا ەكس-پرەزيدەنت، «نۇروتان» پارتياسىنىڭ توراعاسى نۇرسۇلتان نازارباەۆ ءوزىنىڭ ءبىرىنشى ورىنباسارى باۋىرجان بايبەكتى قابىلاپ، پارتياعا «پەرەزاگرۋزكا» جاساۋ قاجەتتىگىن ايتىپ، الدا كەلە جاتقان پارلامەنت سايلاۋى جونىندە اڭگىمە قوزعادى. ساراپشىلار پىكىرىنشە، كەزەكتەن تىس پارلامەنت سايلاۋى بيىل كۇزدە نەمەسە 2020 جىلداڭ قاڭتار-اقپان ايلارىندا ءوتۋى مۇمكىن.

"The Qazaq Times"