فوتو: https://sputniknews.kz

«استانا LRT» جشس-ءنىڭ بۇرىنعى باسقارما توراعاسى تالعات اردانعا حالىقارالىق ىزدەۋ جاريالاندى.

ۇكىمەت ۇيىندە وتكەن ءباسپاسوز ماسليحاتى بارىسىندا اتالعان كومپانيانىڭ قازىرگى باسشىسى بەكمىرزا يگەنبەرديەۆ سوت ت.اردانعا قاتىستى سىرتتاي شەشىم شىعارىپ، ىزدەۋ جاريالاعانىن ايتتى. «استانا LRT»-ءنىڭ باسشىسى يگەنبەرديەۆ: «وسى ىسكە قاتىستى تەرگەۋ امالدارى جۇرگىزىلىپ جاتقاندىقتان، ازىرگە وزگە اقپاراتتاردى جاريالاي المايمىز. بۇل ماسەلە 2008 جىلدان بەرى ايتىلىپ كەلەدى»، – دەدى.

وسىعان دەيىن سىبايلاس جەمقورلىققا قارسى ءىس-قيمىل اگەنتتىگى «استانا LRT»-ءنىڭ بۇرىنعى باسشىسىنىڭ اتىنان قىلمىستىق ءىس قوزعاپ، ونى قاماۋعا الۋ تۋرالى ءوتىنىش جولداعان. قازىرگى ۋاقىتتا ينتەرپول وسى ماسەلەنى نازاردا ۇستاپ وتىر.

ايتا كەتەيىك، «استانا LRT» قۇرىلىسى 2016 جىلى باستالعان. باستاپقى جوسپار بويىنشا قۇرىلىس جۇمىستارى 2019 جىلى 31 جەلتوقساندا اياقتالىپ، 2020 جىلى جازدا پايدالانۋعا بەرىلۋى ءتيىس ەدى. 22 كيلومەتردەن اساتىن جولدى سالۋعا 1 ميلليارد 887 ميلليون دوللار بولىنگەن. بىراق كەيىن قۇرىلىس جۇمىستارى توقتاپ قالعان.

"The Qazaq Times"