19 شىلدە تۇندە ورمۋز بۇعازىندا ۇستالعان بريتاندىق تانكەر. فوتو: https://skynews-stena-imper

ناتو مەن ەۋروپالىق وداق يراننان پارسى شىعاناعىندا ۇستالعان بريتان تانكەرىن دەرەۋ بوساتۋدى تالاپ ەتتى.

ەو-نىڭ سىرتقى ساياسي قىزمەتى تاراتقان مالىمدەمەدە: «يران تاراپىنىڭ ەكى كەمەنى ورمۋز بۇعازىندا قۇرىقتاۋى ايتارلىقتاي الاڭداۋشىلىق تۋعىزادى. ءبىز شيەلەنىس جالعاسپاۋى ءۇشىن كەمەنى جانە ونداعى كوماندانى تەز ارادا بوساتىپ، ۇستامدى بولۋعا شاقىرامىز. كەمە قاتىناسىندا ەركىندىك ساقتالۋى ءتيىس. وقيعانىڭ بۇلاي ءوربۋى ونسىز دا شيەلەنسىكەن جاعدايدى ۋشىقتىرىپ، قازىرگى شيەلەنىستى رەتتەۋگە باعىتتالعان جۇمىسقا كەدەرگىسىن كەلتىرۋى مۇمكىن»، – دەلىنگەن.

19 شىلدە تۇندە ورمۋز بۇعازىندا يران بيلىگى ەكى بريتاندىق كەمەنى باسىپ العان بولاتىن. ۇستالعان ەكى كەمەنىڭ بىرىندە – بريتان تۋى، ەكىنشىسىندە ليبەريا تۋى ىلىنگەن. يران تارابىنىڭ مالىمدەۋىنشە، بريتانيالىق Stena Impero مۇناي تانكەرى جۇما كۇنى تۇندە حورموزگان پروۆينتسياسىنىڭ ايلاق جانە تەڭىز ۇيىمىنىڭ وتىنىشىمەن ۇستالعان. وعان حالىقارالىق تەڭىز ەرەجەلەرىن بۇزدى دەگەن ايىپ تاعىلدى.

Sky News تەلەارناسىنىڭ جاڭالىقتارىندا ۇلىبريتانيا سىرتقى ىستەر ءمينيسترى دجەرەمي حانت ورمۋز بۇعازىندا كەمەلەر قوزعالىسىنا شەكتەۋ قويىلسا، بۇدان يران جاعى كوبىرەك زارداپ شەگەدى دەپ ەسكەرتتى. ەندى بريتانيا بۇعان جاۋاپ رەتىندە يرانعا سانكتسيا پاكەتىن ازىرلەپ جاتىر. لوندون ەۋرووداق پەن بۇۇ-دان دا تەھرانعا قارسى شەكتەۋ ەنگىزۋىن سۇراماق. بۇۇ-نىڭ قاۋىپسىزدىك كەڭەسىنە جولداعان حاتىندا لوندون بۇل ارەكەتتى «ەلدىڭ ىشكى ىسىنە ارالاسۋ» دەپ ايىپتادى.

وسىعان دەيىن اقش پەن ساۋد ارابياسى تەھراندى ومان جانە پارسى شىعاناعىندا تانكەرلەرگە شابۋىل جاسادى دەپ ايىپتاعاننان سوڭ يران جاعالاۋىنداعى جاعداي شيەلەنىسە باستادى. اتالعان جاعدايدىڭ حرونولوگياسىنا كوز جۇگىرتسەك، 11 مامىردا اراب امىرلىكتەرىنە تيەسىلى سۋدا جۇزگەن كەم دەگەندە ءتورت كەمەگە شابۋىل جاسالعان.

4 شىلدەدە ۇلىبريتانيانىڭ تەڭىز بارلاۋى گيبرالتاردا حالىقارالىق سانكتسيا بارىنا قاراماستان سۇرياعا بارا جاتقان يراندىق Grace-1 كەمەسىن ۇستادى. تەھرانجاۋاپ رەتىندە شارا قابىلداۋعا ۋادە ەتكەن. ال 9 شىلدەدە ۇلىبريتانيا يران كەمەلەرى بريتان مۇناي تانكەرلەرىن باسىپ الماق بولدى دەپ اقپارات تارتاتتى. رەسمي تەھران بۇل مالىمدەمەمەن كەلىسپەيتىنىن ءبىلدىردى.

كەيىننەن ياعني 16 شىلدەدە ورمۋز بۇعازىنان ءوتىپ بارا جاتقان بىرىككەن اراب امىرلىكتەرىنىڭ ء(باا) مۇناي تانكەرى ەكى كۇننەن بەرى حابارسىز كەتكەن. سوڭعى دەرەك بويىنشا، تانكەر يرانعا قاراي وتكەن. وسى جاعدايلاردان كەيىن اقش، ۇلىبريتانيا جانە ساۋد ارابياسى يراننان كۇدىكتەنىپ وتىر. ناتو مەن ەۋروپالىق وداق تا ەسكەرتۋ جاسادى. دەگەنمەن، تەھران بۇل ايىپتاۋلاردى تۇبەگەيلى جوققا شىعارىپ وتىر.

"The Qazaq Times"