رەسەي پرەزيدەنتى ۆلاديمير پۋتين ءبىرىنشى رەت ۋكراينا پرەزيدەنتىمەن تەلەفون ارقىلى سويلەستى.

كرەملدىڭ ءباسپاسوز حاتشىسى دميتري پەسكوۆتىڭ ايتۋىنشا، ەكى ەل باسشىلارى ۋكرايناداعى قاقتىعىس ايماقتارى، كەرش بۇعازىنداعى جاعداي مەن ديپلوماتيالىق بايلانىستى تالقىلاعان. زەلەنسكي تارابىنان ايتىلعان نەگىزگى اڭگىمە – ماسكەۋدىڭ ۋكراين تەڭىزشىلەرىن سوتتاۋى. سونىمەن قاتار، پۋتين مەن زەلەنسكي رەسەيدەگى ۋكراين ازاماتتارىنىڭ ەلىنە ورالۋى، الداعى كۇندەرى باتىس كوشباسشىلارىمەن بىرگە جاڭا فورماتتاعى كەزدەسۋ ۇيىمداستىرۋدى تالقىعا سالعان.

وسىعان دەيىن «روسسيا 24» جانە ۋكرايندىق NewsOne تەلەارنالارى بىرىگىپ ەل تۇرعىندارى اراسىندا ديالوگ ۇيىمداستىرۋ ماقساتىندا تەلەكوپىر وتكىزىلەتىنىن حابارلاعان. الايدا، باستاما ساياسي تۇرعىداعى سىني پىكىرلەرگە بايلانىستى وتپەيتىن بولدى. سونىمەن قاتار، 8 شىلدەدە ۆلاديمير پۋتين يتاليالىق باسىلىمعا سۇحبات بەرىپ، رەسەي ەۋرووداقپەن تولىق فورماتتى قارىم-قاتىناستاردى قالپىنا كەلتىرىپ، ۋكراينامەن اشىق ديالوگ جۇرگىزۋگە دايىن دەپ مالىمدەگەن. ال 9 شىلدەدە ۋكراين پرەزيدەنتى رەسەي پرەزيدەنتى ۆلاديمير ءپۋتيندى ەۋروپا ەلدەرىنىڭ باسشىلارى باس قوساتىن جاڭا فورماتتاعى كەزدەسۋدە پىكىرسايىس وتكىزۋگە شاقىرعان. پىكىرسايىسقا اقش پرەزيدەنتى دونالد ترامپ، گەرمانيا كانتسلەرى انگەلا مەركەل، فرانتسيا پرەزيدەنتى ەممانۋەل ماكرون جانە ۇلىبريتانيا پرەمەر-ءمينيسترى تەرەزا مەي شاقىرىلىپ، كەزدەسۋ ميسكتە وتەدى دەپ جوسپارلانعان. دەگەنمەن، رەسمي كرەمل بۇعان قاتىستى ناقتى جاۋاپ بەرگەن جوق.

ايتا كەتەيىك، 25 قاراشادا رەسەي كەرش بۇعازىندا ۋكراينا اسكەري-تەڭىز كۇشتەرىنىڭ ءۇش كەمەسىن باسىپ الىپ، وق اتقان. ارتىنشا ماسكەۋ 20-عا جۋىق ۋكراين تەڭىزشىلەرىن قاماۋعا الدى. ۋكراينانىڭ سول كەزدەگى پرەزيدەنتى پەتر پوروشەنكو رەسەيدىڭ بۇل ارەكەتىن «باسقىنشىلىق» دەپ اتاپ، ولاردان ازوۆ تەڭىزىندە ۇستالعان ۋكراينا اسكەري كەمەلەرى مەن تەڭىزشىلەرىن دەرەۋ بوساتۋدى تالاپ ەتتى. ال ماسكەۋ ۋكرايندىق كەمەلەر رەسەي شەكاراسىن بۇزدى دەپ ايىپتادى. ازىرشە، بۇل جاعداي دا ەكى ەل اراسىنداعى شەشىمىن تاپپاعان كەزەكتى تەكەتىرەس رەتىدە قالىپ وتىر.

 

"The Qazaq Times"