ەۋروكوميسسيا بيۋدجەتتىك ەرەجەلەردى بۇزعان يتالياعا سانكتسيا سالۋدان باس تارتتى. بۇعان ەلدىڭ ەكونوميكالىق داعدارىسى سەبەپ. 

وداقتىڭ ەكونوميكا جانە قارجى جونىندەگى ەۋروكوميسسارى پەر موسكوۆيسيدىڭ مالىمەتىنشە، مۇنداي شەشىمگە يتاليانىڭ قارجىلىق تاپشىلىعى سەبەپ بولعان. بىرنەشە كۇن بۇرىن ريم ەلدىڭ جىلدىق بيۋدجەت تاپشىلىعىن 7,6 ميلليارد دوللارعا قىسقارتۋعا مۇمكىندىك بەرەتىن شارالاردى ماقۇلداعان بولاتىن. ناتيجەسىندە، يتاليانىڭ تاپشىلىعى جالپى ىشكى ءونىمنىڭ 2%-نا جەتكەن. ەندى يتاليا 15 قازانعا دەيىن ەۋروكوميسسياعا 2020 جىلعا ارنالعان بيۋدجەتتى ۇسىنۋى ءتيىس.

ارنايى كەڭەستە ەۋروكوميسسار: «ەۋروكوميسسيا شامادان تىس تاپشىلىق پروتسەدۋراسىنا نەگىزدەلگەن يتاليانىڭ قارىزى قازىرگى ۋاقىتتا ناقتى ەمەس دەگەن شەشىمگە كەلدى. مەن ونى كەلەسى اپتادا وتەتىن ەۋروكوميسسيا وتىرىسىندا تولىق تۇسىندىرەمىن. جانە ونىمەن وداققا مۇشە ەلدەردىڭ قارجى مينيسترلەرى كەلىسەدى دەپ ۇمىتتەنەمىن»، – دەدى.

بىلتىر وسى ماسەلەگە قاتىستى كەزەكتى جيىن ءوتىپ، ەۋروكوميسسيا يتاليادان العاش رەت بيۋدجەت جوباسىن تولىقتىرۋدى تالاپ ەتكەن. ريم الەۋمەتتىك باعدارلامالارعا قاتىستى بيۋدجەت كولەمىن 0,9%-عا ۇلعايتۋدى ۇسىنعانمەن، بريۋسسەل ونى كەرى قايتاردى. سەبەبى، ەكى تاراپ ۇسىنىسىنداعى ايىرماشىلىق 25 ميلليارد ەۋروعا جەتكەن. قازىردىڭ وزىندە يتاليا جۇمىسسىزدىق يندەكسى بويىنشا ەو ەلدەرى اراسىندا ءۇشىنشى ورىندا. كەيىننەن ەلدەگى قارجىلىق داعدارىستى جانە جۇمىسسىزدىق دەڭگەيىن قالىپقا كەلتىرۋ ءۇشىن پرەزيدەنت سەردجو ماتتارەللو جاڭا رەفورما قابىلداناتىنىن مالىمدەگەن.

"The Qazaq Times"