ەۋروكەڭەس توراعاسى دونالد تۋسك. فوتو: https://www.thetimes.co.uk

بريۋسسەلدە ەۋرووداقتىڭ جاۋاپتى لاۋازىمدارىنا ۇمىتكەرلەردى سايلاۋعا قاتىستى ۇشكۇندىك مارافون اياقتالدى. ناتيجەسىندە، ەۋروكەڭەس توراعالىعىنا بەلگيا پرەمەرى شارل ميشەل سايلاندى.

بريتانيالىق «The Times» باسىلىمىنىڭ حابارلاۋىنشا، سامميتتە ەۋرووداقتاعى وزگە دە ءتورت باسقارۋشىلىق قىزمەتىنە لايىقتى ۇمىتكەرلەر دە انىقتالعان. وداققا مۇشە 28 مەملەكەت باسشىلارىنىڭ شەشىمى بويىنشا ەۋروكوميسسيا پرەزيدەنتى قىزمەتىنە گەرمانيانىڭ قورعانىس ءمينيسترى ۋرسۋلۋ فون دەر ليايەن ۇسىنىلدى. ەۋروپانىڭ ورتالىق بانكىنە حالىقارالىق ۆاليۋتا قورىنىڭ وكىمشى-ديرەكتورى كريستين لاگارد، ال ەو ديپلوماتياسى باسشىسىلىعىنا يسپانيا سىرتقى ىستەر ءمينيسترى جانە ەۋروپارلامەنتتىڭ بۇرىنعى توراعاسى جوزەپ بوررەل كانديداتۋراسى لايىقتى دەپ تانىلدى. ەگەر گەرمانيادان ۇسىنىلعان ۇمىكتەر ۋرسۋلۋ فون دەر ليايەن جەڭىسكە جەتسە، تاريحتا تۇڭعىش رەت ەۋروپالىق كوميسسيانى ايەل ادام باسقارماق. اتالعان كانديداتۋرالار ەۋروپارلامەنتتە ماقۇلدانسا، وداقتىڭ نەگىزگى ءتورت قىزمەتىنىڭ باسشىسى 1 قاراشادان باستاپ ءوز قىزمەتىن باستايدى.

باسقارۋشى قىزمەت كانديداتتارى ءمالىم بولعاندىقتان، بۇگىن ەۋروپارلامەنت ستراسبۋرگتە وتەتىن پلەنارلىق سەسسيادا ءوزىنىڭ جاڭا پرەزيدەنتىن انىقتايدى. شەتەلدىك باسىلىمدار تاراتقان مالىمەتتەرگە سۇيەنسەك، جاۋاپتى قىزمەتتى بولگاريالىق سەرگەي ستانيشەۆ يەلەنۋى مۇمكىن. ال 2024 جىلدىڭ قازانىنا دەيىن اتالعان لاۋازىمعا گەرمانيالىق مانفرەد ۆەبەر ۇسىنىلماق. سامميت قورىتىندىسى بويىنشا ەۋروكەڭەس توراعاسى لاۋازىمىن اتقاراتىن بەلگيا پرەمەر-ءمينيسترى شارل ميشەل: «ەۋروكەڭەس توراعاسى بولىپ سايلانۋىم مەن ءۇشىن ۇلكەن قۇرمەت. مەن بار جاۋاپكەرشىلىكتى سەزىنە وتىرىپ، الدىما قويىلعان مىندەتتەردى ورىنداۋ ءۇشىن قولىمنان كەلگەنننىڭ ءبارىن جاساۋعا دايىنمىن. بۇگىندە ەۋروپا كوپتەگەن سىن-تەگەۋرىن الدىندا تۇر. بىراق مەن ولاردى مۇمكىندىك رەتىندە دە قاراستىرامىن. الداعى 5 جىل ءبىزدىڭ ەۋروپالىق جوبامىز ءۇشىن وتە ماڭىزدى كەزەڭ بولماق. جانە سول ءۇشىن بىرلىگىمىز بەن ىنتىماقتاستىعىمىزدى نىعايتىپ، ونى قورعاۋ كەرەكتىگىنە سەنىمدىمىن»، – دەدى.

ەۋروپالىق وداق ءۇشىن ايتۋلى سامميتكە قاتىستى سۇحبات بەرگەن ەۋروكەڭەس توراعاسى دونالد تۋسك: «ەۋروپارلامەنتتىڭ العاشقى سەسسياسى باستالماي تۇرىپ باسشىلىق قىزمەتكە كىمنىڭ سايلاناتىنى جونىندە كەلىسىمگە كەلدىك. 5 جىل بۇرىن بۇل ماسەلەنى شەشۋگە 3 اي ۋاقىت كەتەتىن. سونىڭ وزىندە كەي باسشىلار قارسىلىق تانىتۋشى ەدى. ال بيىل وعان نەبارى 3 كۇن ارنادىق. جانە قابىلدانعان شەشىمگە ەشكىم قارسى بولعان جوق. ءتىپتى گەرمانيا ەۋروكوميسسيا باسشىسىن سايلاۋدا داۋىس بەرۋدەن باس تارتقانىمەن، كانتسلەر انگەلا مەركەلدىڭ ءوزى جالپى العاندا ونى قولداپ وتىر. ءبىرىنشى كەزەكتە، ءبىز ەڭ جاۋاپتى 4 قىزمەتكە ەكى ايەل ادام مەن ەكى ەر ادامدى تاڭدادىق. بۇل ءمىنسىز گەندەرلىك تەڭدىكتى كورسەتەدى. سول ءۇشىن وتە قۋانىشتىمىن»، – دەپ مالىمدەدى.

ەسكە سالا كەتەيىك، ەۋرووداق كوشباسشىسىن سايلاۋ 1 شىلدەدە باستالعان. ەۋروپالىق كەڭەس توراعاسى قىزمەتىنە بولگاريالىق كريستالينا گەورگيەۆانىڭ، ال ەۋرووداقتىڭ سىرتقى ىستەر بويىنشا جوعارعى وكىلى قىزمەتىنە بەلگيالىق شارل ميشەلدىڭ كانديداتۋرالارى قاراستىرىلعان. ال ەۋروپارلامەنت جەتەكشىلىگىنە گەرمانيالىق مانفرەد ۆەبەردى سايلاۋ ۇسىنىلعان بولاتىن. دەگەنمەن، سايلاۋدىڭ العاشقى كۇنى ەش ناتيجە بەرگەن جوق. ءوز كەزەگىندە فرانتسيا پرەزيدەنتى ەممانۋەل ماكرون سامميت، كەلىسسوزدەردىڭ ناتيجە بەرمەۋى مەملەكەتتەر اراسىنداعى ساياسي الاۋىزدىق سالدارىنان دەگەن بولاتىن.

"The Qazaq Times"