Eurokeñes törağası Donal'd Tusk. Foto: https://www.thetimes.co.uk

Bryussel'de Euroodaqtıñ jauaptı lauazımdarına ümitkerlerdi saylauğa qatıstı üşkündik marafon ayaqtaldı. Nätijesinde, Eurokeñes törağalığına Bel'giya prem'eri Şarl' Mişel' saylandı.

Britaniyalıq «The Times» basılımınıñ habarlauınşa, sammitte Euroodaqtağı özge de tört basqaruşılıq qızmetine layıqtı ümitkerler de anıqtalğan. Odaqqa müşe 28 memleket basşılarınıñ şeşimi boyınşa Eurokomissiya prezidenti qızmetine Germaniyanıñ qorğanıs ministri Ursulu fon der Lyayen wsınıldı. Europanıñ Ortalıq bankine Halıqaralıq valyuta qorınıñ ökimşi-direktorı Kristin Lagard, al EO diplomatiyası basşısılığına Ispaniya sırtqı ister ministri jäne Europarlamenttiñ bwrınğı törağası Jozep Borrel' kandidaturası layıqtı dep tanıldı. Eger Germaniyadan wsınılğan ümikter Ursulu fon der Lyayen jeñiske jetse, tarihta twñğış ret Europalıq komissiyanı äyel adam basqarmaq. Atalğan kandidaturalar Europarlamentte maqwldansa, Odaqtıñ negizgi tört qızmetiniñ basşısı 1 qaraşadan bastap öz qızmetin bastaydı.

Basqaruşı qızmet kandidattarı mälim bolğandıqtan, bügin Europarlament Strasburgte ötetin plenarlıq sessiyada öziniñ jaña prezidentin anıqtaydı. Şeteldik basılımdar taratqan mälimetterge süyensek, jauaptı qızmetti bolgariyalıq Sergey Stanişev ielenui mümkin. Al 2024 jıldıñ qazanına deyin atalğan lauazımğa Germaniyalıq Manfred Veber wsınılmaq. Sammit qorıtındısı boyınşa Eurokeñes törağası lauazımın atqaratın Bel'giya prem'er-ministri Şarl' Mişel': «Eurokeñes törağası bolıp saylanuım men üşin ülken qwrmet. Men bar jauapkerşilikti sezine otırıp, aldıma qoyılğan mindetterdi orındau üşin qolımnan kelgennniñ bärin jasauğa dayınmın. Büginde Europa köptegen sın-tegeurin aldında twr. Biraq men olardı mümkindik retinde de qarastıramın. Aldağı 5 jıl bizdiñ Europalıq jobamız üşin öte mañızdı kezeñ bolmaq. Jäne sol üşin birligimiz ben ıntımaqtastığımızdı nığaytıp, onı qorğau kerektigine senimdimin», – dedi.

Europalıq odaq üşin aytulı sammitke qatıstı swhbat bergen Eurokeñes törağası Donal'd Tusk: «Europarlamenttiñ alğaşqı sessiyası bastalmay twrıp basşılıq qızmetke kimniñ saylanatını jöninde kelisimge keldik. 5 jıl bwrın bwl mäseleni şeşuge 3 ay uaqıt ketetin. Sonıñ özinde key basşılar qarsılıq tanıtuşı edi. Al biıl oğan nebäri 3 kün arnadıq. Jäne qabıldanğan şeşimge eşkim qarsı bolğan joq. Tipti Germaniya Eurokomissiya basşısın saylauda dauıs beruden bas tartqanımen, kancler Angela Merkel'diñ özi jalpı alğanda onı qoldap otır. Birinşi kezekte, biz eñ jauaptı 4 qızmetke eki äyel adam men eki er adamdı tañdadıq. Bwl minsiz genderlik teñdikti körsetedi. Sol üşin öte quanıştımın», – dep mälimdedi.

Eske sala keteyik, Euroodaq köşbasşısın saylau 1 şildede bastalğan. Europalıq Keñes törağası qızmetine bolgariyalıq Kristalina Georgievanıñ, al Euroodaqtıñ sırtqı ister boyınşa Joğarğı ökili qızmetine bel'giyalıq Şarl' Mişel'diñ kandidaturaları qarastırılğan. Al Europarlament jetekşiligine germaniyalıq Manfred Veberdi saylau wsınılğan bolatın. Degenmen, saylaudıñ alğaşqı küni eş nätije bergen joq. Öz kezeginde Franciya prezidenti Emmanuel' Makron sammit, kelissözderdiñ nätije bermeui memleketter arasındağı sayasi alauızdıq saldarınan degen bolatın.

"The Qazaq Times"