گرۋزيا اۋە قاتىناستارىنا رەسەي اۋماعىندا ۇشۋعا تىيىم سالىندى

گرۋزيا اۋە كومپانيالارى 8 شىلدەدەن باستاپ رەسەي اۋماعىندا ۇشپايدى. بۇل تۋرالى رف كولىك مينيسترلىگى حابارلادى.

مالىمەتتەر بويىنشا، اۋە قاتىناسىنىڭ توقتاۋىنا اۋە قاۋىپسىزدىگى ماسەلەسى جانە «اۋە قوزعالىسىن ۇيىمداستىرۋ جونىندەگى  مەمكورپوراتسيا» فمۋك الدىنداعى اەروناۆيگاتسيالىق قىزمەت ءۇشىن قارىزدىڭ ارتۋى سەبەپ بولعان. «Georgian Airways» جانە «MyWay Airlines» كومپانيالارى اۋە قاۋىپسىزدىگى باعدارلاماسىن ۇسىنىپ، قارىزدى وتەپ بىتكەنگە دەيىن تىيىم سالۋ تۋرالى شەشىم ءوز كۇشىندە قالماق. گرۋزيانىڭ اەروناۆيگاتسيالىق قىزمەت ءۇشىن قارىزىنىڭ جالپى سوماسى $793 مىڭعا جەتكەن. ال 2008 جىلدان بەرى 592,2 مىڭ رۋبل تولەنبەگەن.

21 ماۋسىمدا رەسەي دەلەگاتسياسىنىڭ پراۆوسلاۆيە پارلامەنتارالىق باس اسسامبلەياسىنا قاتىسۋىنا بايلانىستى تبليسيدە جاپپاي نارازىلىق وتكەن بولاتىن. دەلەگاتسيانى باسقارۋشى جانە اسم باسشىسى رف مەملەكەتتىك دۋماسىنىڭ دەپۋتاتى سەرگەي گاۆريلوۆتىڭ سەسسيا كەزىندە گرۋزيا پارلامەنتى سپيكەرىنىڭ كرەسلوسىنا وتىرىپ، جينالعاندارعا ورىس تىلىندە سويلەگەنى وپپوزيتسيانىڭ نارازىلىعىن تۋدىرعان. گرۋزيانىڭ وپپوزيتسيالىق دەپۋتاتتارى مۇنى قورلاۋ دەپ باعالاپ نارازىلىقتارىن ءبىلدىرىپ، باس اسسامبلەيانىڭ جۇمىسىن توقتاتتى. ەلدىڭ ىشكى ىستەر ءمينيسترى گ.گاحاريا شەرۋشىلەردى پولتسياعا باعىنۋعا شاقىرعانمەن، ناتيجە بولعان جوق. كەيىننەن رف مەملەكەتتىك دۋماسىنىڭ دەپۋتاتى س.گاۆريلوۆ جانە باسقا دا مەملەكەتتىك دۋمانىڭ دەپۋتاتتارى تبيليسيدەن ۇشىپ كەتكەن. ءدال وسى كۇنى رەسەي پرەزيدەنتى ۆلاديمير پۋتين گرۋزيا اۋە قاتىناستارىنىڭ رەسەي اۋماعىندا ۇشۋىنا تىيىم سالۋ تۋرالى جارلىققا قول قويدى.

"The Qazaq Times"