يران اقش-تىڭ بارلاۋشى درونىن اتىپ ءتۇسىردى

يراننىڭ رەۆوليۋتسيا ساقشىلار كورپۋسى ەلدىڭ اۋە كەڭىستىگىن بۇزىپ كىرگەن اقش-تىڭ بارلاۋشى درونىن حورموزگان پروۆينتسياسىنىڭ ۇستىنە جەتكەندە اتىپ تۇسىرگەنىن مالىمدەدى. قۇراما شتاتتىڭ اسكەري تەڭىز كۇشتەرى وزدەرىنە تيەسىلى ۇشقىشسىز ۇشۋ قۇرىلعىسىنىڭ قۇلاعانىن راستاعان.

حورموزگان پروۆينتسياسى مۇناي تاسىمالىندا اسا ماڭىزدى سانالاتىن ورمۋز بۇعازىنا جاقىن ورنالاسقان. مالىمەتتەرگە قاراعاندا يران اۋە كۇشتەرى اتىپ قۇلاتقان درون RQ-4 Global Hawk تۇرىندەگى امەريكالىق ۇشقىشسىز ۇشۋ قۇرىلعىسى. بۇنداي مالىمەتتى «رەيتەر» اگەنتتىگى دە راستاعان.

يراننىڭ اقش-قا تيەسىلى اسكەري تەحنيكانى اتىپ قۇلاتۋى ەكى ەل اراسىنداعى قايشىلىقتىڭ اسقىنىپ تۇرعان تۇسىندا بولدى. بۇعان دەيىن اقش پرەزيدەنتى دونالد ترامپ يرانعا جاساعان ەسكەرتۋىندە قۇراما شتاتقا تيەسىلى مۇلىكتەرگە زيان كەلگەن جاعدايدا ونىڭ جاۋابى اۋىر بولاتىنىن ايتقان ەدى. ول كەزدە ترامپ ۇكىمەتى تەھراندى (تەگەران) اقش-تىڭ ورتا شىعىستاعى اسكەري بازالارىنا شابۋىل جاساۋدى جوسپارلادى دەپ ايىپتاعان بولاتىن.

يراننىڭ قاستاندىق ارەكەتتەرىنە قارسى تۇرۋ دەگەن ۋاجبەن قۇراما پارسى شىعاناعىنا جاقىن اسكەري بازالارىن كۇشتى دايىندىق كۇيىنە وتكىزدى جانە بۇل وڭىردەگى امەريكالىق جاۋىنگەرلەردىڭ سانىن كوبەيتتى. ءبىر اي بۇرىن پەنتاگون مەن اق ءۇيدىڭ ۇسىنىسى بويىنشا اتالعان ايماققا 1500 جاۋىنگەر جىبەرگەن.

بۇل جاعدايلار اقش پەن يران اراسىنداعى قايشىلىقتىڭ شىرقاۋ شىڭىنا شىعا باستاعانىن كورسەتەدى. وسى اپتانىڭ باسىندا عانا يران اقش-تىڭ ەكونوميكالىق قىسىمىنا بايلانىستى 2015 جىلى قول قويعان يادرولىق كەلىسىمدى توقتاتۋى مۇمكىن ەكەنىن مالىمدەگەن.

بۇل جاعداي ەكى ەلدى دە كەلىسسوز مۇمكىندىگىنەن الىستاتىپ جىبەرەدى. ارينە، يران ءوز تەرريتورياسىنا كىرگەن شەتەلدىك اسكەري تەحنيكانى اتىپ قۇلاتتى، الايدا، قۇراما شتات ءۇشىن بۇل اسكەري قادامدارعا تولىمدى سەبەپ بولا الادى.

“The Qazaq Times”