«جاڭا قازاقستان» فورۋمى تارادى

زاڭدى تۇلعا بولماسا دا «جاڭا قازاقستان» فورۋمى ءاۋ-باستان بارلىق كوزى اشىق، كوكىرەگى وياۋ ازاماتتار مەن ۇيىمدار ءۇشىن اشىق ۇندەسۋ الاڭى بولىپ تابىلادى. ەل جانە ونىڭ بولاشاعى ءۇشىن جاۋاپكەرشىلىكتى كوتەرۋگە، ونى ساياسي جانە ەكونوميكالىق داعدارىستاردان الىپ شىعۋعا دايىن كۇشتەردىڭ قازاقستاندا بار ەكەنىن كورسەتۋ - ءبىزدىڭ الدىمىزدا تۇرعان وتە ماڭىزدى ماقسات. وتكەن جىلدىڭ ءساۋىر ايىندا بريۋسسەلدە ەۆروپارلامەنت دەپۋتاتتارىمەن بولعان كەزدەسۋلەردە وسى تۇرعىدا مالىمدەمە جاسالعان ەدى.

سول كەزدە قىزمەتتەستەرىمىزدىڭ ءبىرى باشىر جاڭالتاي قىتايداعى شىڭجان ەتنيكالىق قازاقتارىنا قارسى قۋدالاۋ مەن رەپرەسسيالار تاقىرىبىن ەۆروپارلامەنتتىڭ مىنبەرىنە شىعىپ كوتەرگەن ەدى. 2018 جىلعى ماۋسىمدا ۆاشينگتونعا ساپار بارىسىندا فورۋم قاتىسۋشىلارى اشارشىلىق ماسەلەسىن اقش كونگرەسىندە العاش رەت كوتەردى. مەملەكەتتىك دەپارتامەنت وكىلدەرىمەن كەزدەسكەن كەزدە ولارعا «ماگنيتسكي ءتىزىمى» ءبىرىنشى رەت بەرىلدى. وسى ءتىزىم جاڭاوزەن مۇنايشىلارىن اتۋعا جاۋاپتى جوعارى لاۋزىمدى ادامداردان تۇرادى. فورۋم بويىنشا شەت ەلدەردە تۇراتىن قىزمەتتەستەرىمىز شەنەۋنىكتەر قازاقستاننان جىمقىرىپ، سىرتقا شىعارعان اقشا قۇرالدارىن ىزدەستىرۋگە بەلسەندى تۇردە ات سالىسۋدا. ارينە وسىنداي فورۋمنىڭ قۇرىلۋىنا رۇقسات بەرۋگە اقوردانىڭ نارازى ەكەنى ايتپاسا دا تۇسىنىكتى.

فورۋم كوزدەگەن كوپ مىندەتتەردىڭ ءبىرى - ول پرەزيدەنتتىك جانە پارلامەنتتىك سايلاۋلارعا قاتىسۋعا مۇمكىندىك بەرەتىن جالپىۇلتتىق پارتيا نەمەسە قيمىل ۇيىمداستىرۋ بولدى. ول ءۇشىن وتكەن جىلدىڭ قىركۇيەك ايىندا قازاقستان وڭىرلەرىنىڭ جارتىسىنا جۋىعى فورۋمنىڭ ازىرلەگەن ساياسي باعدارلاماسىمەن تانىستى. سونىمەن قاتار، دات گازەتى ارقىلى ەلەۋلى اعارتۋ جۇمىسى جۇرگىزىلدى. You-tube ارناسىندا "جاڭا قازاقستان جاۋاپ بەرەدى" ايدارى ارقىلى قوعامنىڭ ماڭىزدى ماسەلەلەرىنە ارنالعان كوپتەگەن تالداۋ باعدارلامالارى جاريالاندى.

قۇقىقتىق تىركەۋى جوق فورۋم پرەزيدەنتتىككە ءوز اتىنان كانديدات ۇسىنۋعا مۇمكىندىگى بولمادى. دەگەنمەن ۇيىمداردىڭ ءبىرى ۇسىنىپ، نەمەسە فورۋمنىڭ كەز كەلگەن قاتىسۋشىسىن العا تارتقان جاعدايدا، وعان قولداۋ كورسەتۋ جونىندە ۋاعدالاستىق بولدى. ەكى كانديدات اقيقات جسدپ پارتياسىنان ەرمۇرات باپي  جانە «ۇلت تاعدىرى» رقب-ىنەن ءامىرجان قوسانوۆ العا تارتىلدى. كەيىنىرەك اقيقات جسدپ جالپى جينالىسىن وتكىزىپ، وسى سايلاۋعا بويكوت جاريالاۋ شەشىمىن قابىلدادى.

وتكەن پرەزيدەنتتىك سايلاۋ جانە ازاماتتىق قوعام كانديداتى ءامىرجان قوسانوۆتىڭ وعان قاتىسۋى قوعامنىڭ ساياساتقا دەگەن قىزىعۋشىلىعىن ايتىرلىقتاي كوتەرىپ، جۇرتتىڭ ازاماتتىق بەلسەندىلىگىن وياتتى.

سان قيلى، سان قىرلى ادام سايلاۋعا ۇگىتشى جانە باقىلاۋشى رەتىندە قاتىستى. ءبىز بيلىكتىڭ بۇرىن-سوڭدى بولماعان شىنايى رەيتىنگىن العاش رەت ءوزىمىز ولشەپ، ورتالىق سايلاۋ كوميسسياسىنىڭ رەسمي دەرەگىنەن ونىڭ ايتارلىقتاي تومەن ەكەنىنە كوز جەتكىزدىك. وكىنىشكە قاراي، سايلاۋ ەكىنشى كەزەكپەن جالعاسادى دەپ بايقاۋشىلار سەنىمىدىلىكپەن بولجاسا دا، جاپپاي فالسيفيكاتسيا ورىن الىپ، حالىقتىڭ قولىنداعى جەڭىس تاعى دا جىمقىرىلدى. ءبىزدىڭ كانديدات تا كۇدىككە تولى ەكزيت-پولدىڭ كورسەتكىشىن تەز ارادا قابىلداپ، سايلاۋ بويىنشا باسەكەلەسىن ارتىق اسىعىستىقپەن قۇتتىقتادى. تاۋەلسىز بايقاۋشىلار بىزگە بار اقپاراتتى بەرگەننەن كەيىن، وسى سايلاۋدىڭ لەگيتيمدىگى جوقتىڭ قاسى جانە حالىقارالىق دەموكراتيالىق ستاندارتتارعا سايكەستىگى جوق دەپ ءبىز مالىمدەيمىز. ءبىز قازىرگى پارلامەنتتى تاراتۋعا جانە ماجىلىسكە مەرزىمنەن بۇرىن سايلاۋدى جاريالاۋعا شاقىرامىز. جاڭا اتا زاڭدى قابىلداۋ جانە ساياسي مودەرنيزاتسيا ەلىمىزدىڭ كۇن تارتىبىندە تۇرعان باستى ماسەلەلەر.

سايلاۋ جەڭىسىن جىمقىرعان قازىرگى باسشىلار بيلىكتى بەيبىت ءارى زاڭدى جولمەن اۋىستىرۋعا ءىس جۇزىندە مۇمكىندىك جوق ەكەنىن اشىق كورسەتتى. ءبىز كوشە ميتينگىلەرى مەن كۇشپەن قارسىلاسۋ ارقىلى قوعامدىق ماسەلەلەردى شەشۋگە نارازىمىز، بىراق باسقا امال جوقتىڭ قاسى.

سىزدەر كۇتكەن ءۇمىتتىڭ بارلىعى وسى كۇنگە دەيىن ورىندالمادى دەپ ءبىز قىلجىنامىز، سول ءۇشىن دە كەشىرىم سۇرايمىز. دەي تۇرعانمەن بىزدەر اتقارعان ىستەر مەن قادامنىڭ بارلىعى قۇقىقتىق الاڭدا بولدى جانە ەلىمىزدىڭ ساياسي كونفيگۋراتسياسىن وزگەرتۋگە ءۇمىتىمىز بار. سولاي بولسا دا، اقوردامەن جاسىرىن بايلانىس بار دەگەن سىلتاۋمەن ءبىزدىڭ اتىمىزعا جالعان ايىپتاۋلار كەلىپ تۇسۋدە. ءبىز ءۇشىن ولاردى جوققا شىعارۋ قيىنعا تۇسەدى. تاريح بارىمىزگە ءوز باعاسىن بەرەر، ناتيجە قورىتىندىسىن شىعارار دەگەن ۇمىتتەمىز.

قادام جاسالماي، قاتە بولماس. سول سەبەپتى دە ءبىز فورۋمنىڭ جۇمىسىن ءوز ەركىمىزبەن توقتاتۋعا بەل بۋدىق. ءبىر بولىگى ساياساتقا بەلسەندى ارالاسۋىن توقتاتسا، ەندى بىرەۋلەر ەرمۇرات ءباپيدىڭ جانە پارتيانىڭ ساياسي كەڭەسىنىڭ كەلىسىمى بولعان جاعدايدا اقيقات جسدپ پارتياسىنا قوسىلۋى ابدەن مۇمكىن.

اشارشىلىق، ماگنيتسكي ءتىزىمى، جىمقىرىلعان اكتيۆتەر جانە باسقا دا ماڭىزدى ماسەلەلەر بويىنشا جۇمىستى جالعاستىرۋ ءۇشىن فورۋم ەۆروپادا تىركەلەتىن بولادى. ال كوپتەگەن ادامدار جازىپ جاتقانداي جاڭا پارتيانى تىركەۋ قازىر دە، الداعى جاقىن ۋاقىتتا دا ءبىزدىڭ جوسپارىمىزدا جوق.

بارشاڭىزعا حالىق بيلىگىنىڭ قالىپتاسۋىن جانە قازاقستاندا شىنايى دەموكراتيانىڭ جەڭىسىن تىلەيمىز.

"The Qazaq Times"