گونكونگتەگى اۋقىمدى نارازىلىق شي جينپيڭ رەجيمىنىڭ ءيميدجىن السىرەتتى

ماۋسىم ايىندا گونكونگتە بولعان ماسسالىق ەرەۋىلدەر الەم نازارىن وزىنە اۋداردى. ميلليونداعان ادام قاتىسقان حالىقتىق ەرەۋىلدەن كەيىن بيلىك ەكستراديتسيالاۋ تۋرالى جاڭا زاڭ جوباسىن قابىلداۋدى ۋاقىتشا توقتاتتى. ءتىپتى، گونكونگ ۇكىمەتى رەسمي مالىمدەمە جاساپ، حالىقتان كەشىرىم سۇراۋعا ءماجبۇر بولدى. الەم نازارىن اۋدارعان بۇل جاعدايعا، بەيجىڭ، ۋاشتنگتون جانە گونكونگ تاراپتارىنىڭ قاراتقان كوزقاراسى ءار ءتۇرلى بولدى.

بەيجىڭ گونكونگتەگى حالىقتىق ەرەۋىلدەردىڭ ارتىندا شەتەلدىك كۇشتەر بار دەپ قارايدى جانە بۇل ارەكەتتەر گونكونگتىڭ اۆتونوميالىق قۇقىعىنىڭ شەكتەلۋىنە اپارىپ سوعادى دەگەن. ال، اقش-تىڭ بىرقاتار باسىلىمدارى ماسسالىق شەرۋلەردى بەيجىڭ مەن گونكونگتاعى ليبەرالدار اراسىنداعى ويىن دەپ باعالاعان.

The New York Times باسىلىمى ءبىر كۇن بۇرىن گونكونگتاعى ساياسي جاعدايعا بايلانىستى كولەمدى ساراپتاما جاريالادى. الەم ەلدەرى گونكونگتاعى ساياسي جاعدايدىڭ كۇرت وزگەرگەنىنە كوبىرەك ءمان بەرۋدە. The New York Times گونكونگ بيلىگىنىڭ نارازىلىق شەرۋلەرىنەن كەيىن كۇتپەگەن جەردەن «جەڭىلىس تاپقانىن» باسا ايتادى. ءارى، كەزەكتى ماسسالىق نارازىلىق شەرۋى جانە گونكونگتەگى ساياسي جاعدايلار قىتاي باسشىسى شي ءجينپيڭنىڭ «تەمىردەي قاتتى» رەجيمىنىڭ ءيميدجىن السىرەتتى دەپ قارايدى. «بىقىتقا جاراي قىتاي باسشىسى شي جينپيڭ نارازىلىق اكتسياسى كەزىندە شەتەلدەردە ساپاردا بولىپ، گونكونگتاعى جاعدايلارمەن بەلگىلى ءبىر ارا قاشىقتىقتى ساقتاپ قالدى»، – دەپ جازعان امەريكالىق باسىلىم.

شىن مانىسىندە گونكونگتەگى نارازىلىق شي جينپيڭ قىتاي بيلىگىن ۇستاعان 7 جىلدا بولعان ەڭ ۇلكەن قارسىلىق شاراسى. سونداي-اق، كەزەكتى جاعداي اگرەسسيۆتى جانە اۆتوريتارلىق تاسىلمەن گونكونگكە قىسىم ءتۇسىرىپ وتىرعانىنا قاراماستان، شي ءجينپيڭنىڭ بيلىگى، ءالى دە بولسا، بەلگىلى ءبىر شەكتەۋلەرگە ۇشىرايتىنىن كورسەتىپ بەردى.

“The Qazaq Times”