كەشە جاپونيا پرەمەر-ءمينيسترى يرانداعى ساپارىندا سول ەلدىڭ رۋحاني كوسەمى، اياتوللا حومەينيمەن كەزدەستى. كەزدەسۋدە اقش پەن يران اراسىنداعى كەلىسسوز ماسەلەسى تالقىعا سالىندى. الايدا، يراننىڭ ەڭ جوعارى باسشىسى اقش-پەن كەلىسسوز وتكىزۋدى قالامايتىندارىن مالىمدەدى. 

كەزدەسۋدە جاپونيا پرەمەر-ءمينيسترى شينزو ابە اقش پرەزيدەنتى دونالد ترامپتىڭ "سالەمىن" جەتكىزگەن. بۇدان بۇرىن ترامپ جاپونياداعى ساپارىندا پرەمەر-ءمينيسترى شينزو ابەدەن اقش-يران اراسىنداعى قارىم-قاتىناستىڭ جاقسارۋىنا قولداۋ كورسەتۋىن وتىنگەن ەدى. جاپون پرەمەرى توكيودان اتتانار الدىندا دا كەزەكتى ساپارىندا ەكى ەل قاتىناسىن رەتتەۋگە كۇش سالاتىنىن بىلدىرگەن. الايدا، يران جوعارى باسشىسى ترامپتىڭ جولداۋىنا جاۋاپ قايتارمايتىنىن ايتتى.

ء"بىز ءسىزدىڭ شىنايى نيەتپەن كەلىپ وتىرعانىڭىزدان ەش كۇماندانبايمىز، ترامپتىڭ جولداۋىنا كەلەر بولساق، ونى ديالوگ الماساتىن ادام دەپ سانامايمىن. سوندىقتان دا وعان جاۋاپ بەرمەيمىن", – دەگەن يران جوعارى باسشىسى كەزدەسۋدە.

ابە حومەينيگە اقش-تىڭ يران رەجيمىن وزگەرتۋدى ماقسات ەتپەيتىنىن، بۇل تۋرالى ترامپپەن تالقىلاعانىن جەتكىزگەن. يران باسشىسى بۇل جونىندە: ء"بىزدىڭ اقش-پەن بولعان قايشىلىعىمىز رەجيم الماستىرۋدا ەمەس. ولاردا مۇنداي ماقسات بولعان كۇننىڭ وزىندە ونى جۇزەگە اسىرۋعا شاماسى جەتپەيدى. اقش-تىڭ بۇرىنعى باسشىلارى دا بۇعان كۇش سالىپ كورگەن. بىراق، قاۋقارى جەتپەگەن", – دەگەن.

حومەيني مەن شينزو ابە اراسىنداعى كەزدەسۋدە يادرولىق قارۋ تۋرالى دا تالقىلاندى. جاپون پرەمەرى اقش-تىڭ يرانعا يادرولىق قارۋ جاساۋعا جول بەرمەۋگە تىرىساتىنىن ايتتى. يران جوعارى باسشىسى بۇعان: "يران يادرولىق قارۋعا قارسى ەل. مەن يادرولىق قارۋ جاساۋدى "حارام" دەپ ءپاتۋا شىعاردىم. بىراق، اقش-تىڭ بىلگەنى دۇرىس – ەگەر ءبىز يادرولىق قارۋ جاساۋدى ماقسات ەتسەك، اقش بىزگە كەدەرگى بولا المايدى", – دەپ جاۋاپ بەرگەن.

جاپونيا مەن يران لاۋازىمدىلارى اراسىنداعى كەزدەسۋدىڭ نەگىزگى قورىتىندىسى انىق بولعان. ياعني، يران تارابى اقش-پەن كەلىسسوز جۇرگىزۋدى قالامايدى، سەبەبى، كەلىسسوز جۇرگىزۋ وزىنە دەگەن قىسىمدى ارتتىرۋ دەپ سانايدى. ير جەتەكشىسى سوزىندە: "يران اقش-قا مۇلدە سەنبەيدى. "ورتاق قادام" باعدارلاماسى بويىنشا اقش-پەن جۇرگىزگەن كەلىسسوزدىڭ ساتسىزدىگىن قايتالاعىسى كەلمەيدى. قانداي دا ءبىر ەگەمەن حالىق قىسىم استىندا كەلىسسوزگە كەلۋدى قالامايدى", – دەگەن.

“The Qazaq Times”