يران ءسىم جەتەكشىسى حۋسەين امير ابدۋللاحيان. فوتو:

يراننىڭ جاڭا ۇكىمەتى باتىس ەلدەرىمەن كەلىسسوزدەردە بەلسەندىلىك تانىتىپ كەلەدى. اقش-تىڭ بۇرىنعى پرەزيدەنتى دونالد ترامپ كەزىندە بۇلىنگەن يادرولىق كەلىسىمدى قايتا قالپىنا كەلتىرۋ بويىنشا يران مەن باتىس ەلدەرى اراسىندا كەلىسسوزدەر ءجۇرىپ جاتىر. يران ءسىم باسشىسى مالىمدەمە جاساپ، باتىس ەلدەرى جاقسى نيەت تانىتسا كەلىسىمگە كەلۋگە ءازىر ەكەندىكتەرىن ءبىلدىردى.

ير سىرتقى ىستەر ءمينيسترى حۋسەين امير ابدۋللاحيان الەۋمەتتىك جەلىدەگى مالىمدەمەسىندە قاراشا ايىنىڭ سوڭعى كۇندەرى ۆەنا قالاسىندا وتكەن يران يادرولىق كەلىسىمى تۋراسىنداعى كەلىسسوزدەر تۋرالى پىكىر ءبىلدىردى. «ءبىز ۇيلەسىمدى ءارى ناتيجەنى كوزدەگەن ديالوگ قۇرۋعا دايىنبىز»، – دەدى ابدۋللاحيان «تۆيتتەردە».

يادرولىق قارۋعا يە 6 ەل مەن يران يسلام رەسپۋبليكاسى اراسىنداعى يادرولىق كەلىسىم ترامپ كەزىندە بۇلىنگەن بولاتىن. پرەزيدەنت ترامپ اتالعان كەلىسىمدى يران يادرولىق باعدارلاماسىن توقتاتۋعا قاۋقارسىز دەپ ايىپتاپ، كەلىسىمنەن بىرجاقتى باس تارتقان ەدى. سونداي-اق، ۋاشينگتون يرانعا باعىتتالعان قاتاڭ ەكونوميكالىق سانكتسيالاردى قالپىنا كەلتىرگەن. ناتيجەسىندە يران ەكونوميكاسى اۋىر زارداپ شەكتى.