الماتىدا «ۇلى دالا – كوشپەندىلەر الەمى» حالىقارالىق فەستيۆالى باستالدى

بۇگىن الماتىداعى «بورالداي ساق قورعاندارىندا» «ۇلى دالا – كوشپەندىلەر الەمى» اتتى حالىقارالىق ەتنو-مادەني فەستيۆالى باستالدى. ءداستۇرلى فەستيۆالدا كوشپەندىلەردىڭ ۇمىت بولىپ بارا جاتقان مۇرالارى مەن سالت-داستۇرلەرى ناسيحاتتالماق.

قازاقستان قۇراماسى ساحنادا. فوتو: QT.

الماتى قالالىق اكىمدىگىنىڭ تىكەلەي قولداۋىندا ءوتىپ جاتقان حالىقارالىق شاراعا باعىزى كوشپەندىلەردىڭ بۇگىنگى مۇراگەرلەرى سانالاتىن ەلدەردىڭ ەتنومۋزكانتتار مەن سپورتشىلارى جينالعان. ايتالىق، موڭعوليا، تاۋلى التاي، قالماق رەسپۋبليكاسى، ياكۋتيا، تىۆا، بۋرياتيا، ساحا رەسپۋبليكاسى، قىرعىزستان، وزبەكستان، ماجارستان، باشقۇرتستان، داعىستان جانە ۋكراينا  سىندى 18 ەلدەن جينالعان ونەرپاز، سپورتشىلارى جانە وزگە دە قوناقتارى جينالعان.

بۋرياتيالىق شاماندار. فوتو: QT.

فەستيۆالدىڭ اشىلۋى كونتسەرتتىك شارامەن باستالدى. قازاقستاندىق ونەرپازدار قولا داۋىرىنەن تارتىپ، كۇنى كەشەگى قازاق حاندىعىنا دەيىنگى دالامىزداعى كوشپەلى مادەنيەتتىڭ ىزدەرىن ساحنالاندىرىلعان قويىلىمدارمەن جەتكىزۋگە تىرىستى.

جۇگەنسىز جۇيرىك پەن "نوماد" شاباندوز. فوتو: QT.

«ساق قورعاندارى» ەتنو-كورمەسىنىڭ جانىندا «كيىز قالا» جاسالىپ، قازاق ءۇي مەن ابىلايشا، يتارقالاردا كوشپەندىلەر مادەنيەتىنىڭ مۇرالارى، قولونەر بۇيىمدارى، مۋزىكا اسپاپتارى كورمەگە قويىلعان. سونداي-اق، قولونەرشى شەبەرلەر قىزىعۋشىلارعا شەبەرلىك ساباقتارىن وتۋدە.

"جىلقىنى قولعا ۇيرەتۋ" قويىلىمى. فوتو: QT/ەستاي.

شارادا، ات ۇستىندە ساداق اتۋ، جامبى اتۋ، اساۋ ۇيرەتۋ تاعى باسقا دا ءاتۇستى سپورتتارى مەن دالا جاۋىنگەرلەرىنىڭ سپورتتىق مۇرالارىنان باسەكەلەر وزدىرىلۋدا. سونىمەن قاتار، كوشپەلىنىڭ وزگەدە سپورت تۇرلەرى مەن ونەر مۇرالارى بىرنەشە ايماقتارعا ءبولىنىپ، كەلۋشىلەرگە جان-جاقتى ناسيحاتتاماق.

الماتى قالاسىنىڭ اكىمى جانە ادەبيەت پەن ونەر قايراتكەرلەرى. فوتو: QT.

ايتا كەتەيىك، شارانىڭ ۇيىمداستىرۋ جۇمىستارىندا، ساحنالىق قويىلىمدار دا ءتۇرلى ونەر جارىستارىندا كوشپەندىلەردىڭ بۇگىنگى ۇرپاقتارى بابالاردىڭ ءداستۇرلى مادەنيەتىنەن بارعان سايىن الىستاپ بارا جاتقانىن بايقاۋعا بولادى. مۇنداي ءداستۇرلى مادەنيەتتى، ۇلتتى ەتنو-تاريحتى ناسيحاتتايتىن شارالاردا ەتنوگرافتاردىڭ، سونىڭ ىشىندە كونەنىڭ جوسىن-جورالعىسىنا جۇيرىك ەتنوگراف، تاريحشىلاردىڭ ورىنى وگەيسىپ-اق تۇرادى.

"باتىرلار". فوتو: QT.

ايتالىق، قويىلىمدار مەن كەيبىر سالت-داستۇرلەردى ناسيحاتتاۋدا ەتنوگرافيالىق ناقتىلىقتار مۇلدە ساقتالمايتىنىن باسا ايتقىمىز كەلەدى. جۇگەنسىز ات ءمىنۋ، قومسىز تۇيەگە جۇك ارتۋ باعىزى كوشپەندىلەر ءۇشىن قانشالىق سوراقى ءىس ەكەنىن بۇگىنگى «ناسيحاتشىلار» بىلە مە ەكەن؟!

"قاراعاي ساداق بۋدىرىپ، قىلشانىمدى وققا تولتىرىپ". فوتو: QT/ەستاي.

“The Qazaq Times”