پەتەربوردا ميگرانتتارعا باعىتتالعان رەيد اياقتالدى

بۇدان ون كۇن بۇرىن پەتەربور قالاسىنداعى ءبىر كافەدە جاپپاي توبەلەس بولىپ، 4 ادام پىشاقتان اۋىر جاراقات العان ەدى. رەسەيلىك باسىلىمداردىڭ حابارىنا قاراعاندا، توبەلەسكە قاتىسقان قوس تاراپ تا قالاداعى شەتەلدىك ميگرانتتار دەلىنگەن. وسى وقيعادان كەيىن پەتەربور پوليتسياسى ميگرانتتار تۇراتىن رايوندا اۋقىمدى رەيد الىپ باردى. اۋقىمدى وپەراتسيا بىرنەشە كۇنگە جالعاسقان.

حابارلارعا قاراعاندا، توبەلەس وزبەكستاندىقتار مەن وڭتۇستىك كاۆكازدىق ازاماتتار اراسىندا بولعان. "فونتانكا" اتتى باسىلىم پىشاقتان جاراقات العانداردى وزبەكستان ازاماتتارى دەپ كورسەتكەن. اتالعان قالاداعى جەرگىلىكتى باسىلىمدار بۇل وپەراتسيانىڭ سوڭعى ون جىلداعى ەڭ اۋقىمدى رەيد دەپ باعالاعان. 

پوليتسيا تارابى بۇل وپەراتسيانىڭ ماقساتى قىلمىسقا قاتىستى كۇدىكتىلەردى ىزدەستىرۋ دەپ تۇسىندىرگەن. پوليتسيا مالىمدەمەسىندە: "توبەلەستە پىشاقتان 4 ادام جاراقات الدى. تەرگەۋ ناتيجەسى بويىنشا ايىپتىلار بەلگىلى بولدى. ولار جاقىنعى شەتەلدىك ازاماتتار. مالىمەتتەرگە نەگىزدەلگەندە ولار پەتەربور قالاسىندا جاسىرىنىپ ءجۇر. كەزەكتى رەيد ايىپتىلاردى تابۋعا باعىتتالعان", – دەلىنگەن.

وزبەكستان مەن قىرعىزستاننىڭ رەسەيدەگى ەلشىلىكتەرىنە رەيد تۋرالى ارنايى حابارلاما بەرىلمەگەن. دەسە دە، كۇدىكتى قاتارىندا ۇستالعان ازاماتتارى بولعان جاعدايدا ەلشىلىكتەرگە حابارلانۋى ءتيىس. جەرگىلىكتى باسىلىمداردىڭ سوزىنە سەنسەك ميگرانتتار قاتىسقان مۇنداي توپتىق توبەلەستەر ءجيى تۋىلاتىن كورىنەدى.

“The Qazaq Times”