ۇلتتىق ەكونوميكا ءمينيسترى رۋسلان دالەنوۆ ءوز ەركىمەن وتستاۆكاعا كەتۋگە دايىن. ونىڭ مۇنداي شەشىم قابىلداۋىنا مينيسترلىككە قاراستى دەپارتامەنت ديرەكتورىنىڭ 500 مىڭ تەڭگە پارامەن ۇستالىپ، ارتىنان سوتتالۋى سەبەپ.

قولاستىنداعى قىزمەتكەرى اسلانبەك جاقىپوۆتىڭ جەمقورلىق داۋىمەن سوتتالعانى جايلى سۇراققا دالەنوۆ: «مەن ارينە وتستاۆكاعا بەرەمىن. سوت ۇكىمى كۇشىنە ەنسە، مەن وتستاۆكاعا كەتەمىن»، – دەدى.

31 جاستاعى اسلانبەك جاقىپوۆ ساۋىردە 500 مىڭ تەڭگە پارامەن ۇستالعان. جاقىپوۆ اتالعان سوما ارقىلى ەكونوميكالىق زەرتتەۋ ينستيتۋىنداعى تانىسىنا مەملەكەتتىك تەندەردى ۇتىپ بەرۋگە ۋادە بەرگەن. ايىپتالۋشى سوتتا ءوز كىناسىن تولىق مويىندادى. سوت شەشىمى بويىنشا قر قىلمىستىق كودەكسىنىڭ 190-بابى 3-بولىگى بويىنشا («الاياقتىق، ياعني بوتەننىڭ مۇلكىن جىمقىرۋ نەمەسە الداۋ نەمەسە سەنىمدى تەرىس پايدالانۋ جولىمەن بوتەن مۇلiككە قۇقىقتى يەمدەنۋ») جاۋاپقا تارتىلعان. ون جىلعا جۋىق ۇلتتىق ەكونوميكا مينيسترلىگىندە قىزمەت ەتكەن جاقىپوۆ سوڭعى جىلى بيزنەستى دامىتۋعا قولايلى جاعداي جاسايتىن، باقىلاۋ جۇرگىزەتىن دەپارتامەنتتى باسقاردى.

شەنەۋنىكتىڭ ىسىنە قاتىستى نۇر-سۇلتان قالالىق سوتىنىڭ ءباسپاسوز حاتشىسى بوتاگوز بايانوۆا: «ەسىل اۋداندىق سوتىنىڭ ۇكىمىمەن اسلانبەك جاقىپوۆ الاياقتىق جاساۋ فاكتىسىمەن كىنالى دەپ تابىلىپ، وعان 3 جىلعا باس بوستاندىعىنان ايىرۋ جازاسى تاعايىندالدى. سونداي-اق، سوت ۇكىمىمەن اسلانبەك جاقىپوۆ ءومىر بويىنا مەملەكەتتىك قىزمەت اتقارۋ قۇقىعىنان ايىرىلدى»، – دەپ حابارلادى.

ۇلتتىق ەكونوميكا ءمينيسترى رۋسلان دالەنوۆ ۇكىم كۇشىنە ەنسە، الدىمەن مەملەكەت باسشىسىنىڭ اتىنا ءوز ەركىمەن قىزمەتتەن كەتۋ جايلى ءوتىنىش جازۋى ءتيىس. بىراق ونى وتستاۆكاعا جىبەرۋ-جىبەرمەۋدى پرەزيدەنت شەشەدى.

"The Qazaq Times"