كانديداتتاردىڭ تەلەدەباتى بۇگىن وتەدى

29 مامىر ساعات 18.00-دە پرەزيدەنتتىككە ۇمىتكەرلەر اراسىندا تەلەدەبات وتەدى.

ورتالىق سايلاۋ كوميسسياسىنىڭ مالىمەتىنشە، تەلەدەبات پەن ءسوز سايىستىرۋ ءۇش بولىمنەن تۇرادى. ۋاقىتى – شامامەن 80 مينۋت.

ءبرىنشى ءبولىم ەكى كەزەڭنەن تۇرادى. الدىمەن ءاربىر قاتىسۋشى ءوزىنىڭ سايلاۋالدى باعدارلاماسىن تانىستىرادى. ال ەكىنشى كەزەڭدە قاتىسۋشىلار ءوزارا سۇراق-جاۋاپ وتكىزەدى. قاتىسۋشىلار قارسىلاستارىنا ەكى سۇراقتان قويا الادى جانە ەكى سۇراققا عانا جاۋاپ بەرەدى.

ەكىنشى ءبولىمنىڭ تاقىرىبى «قازاقستاننىڭ الەۋمەتتىك مودەرنيزاتسياسى». ءبىرىنشى كەزەڭىندە ءاربىر قاتىسۋشى بەرىلگەن تاقىرىپتا ءسوز سويلەيدى. ەكىنشى كەزەڭدە كانديداتتار جۇرگىزۋشىنىڭ قويعان سۇراعىنا جاۋاپ بەرۋى ءتيىس

پىكىرتالاستىڭ شەشۋشى بولىمىندە كانديداتتار حالىق الدىندا ياعني سايلاۋشىلارعا جارنامالىق ءسوز ارناۋى ءتيىس.

دەبات «قازمەديا ورتالىعى» كەشەنىنىڭ پاۆيلونىندا ۇيىمداستىرىلىپ، «حابار» تەلەارناسىندا كورسەتىلەدى. جۇرگىزۋشىلەرى – ەرلان يگيسينوۆ پەن قىمبات دوسجان.

ەسكە سالا كەتەيىك، وسى جولى قر وسك جەتى كانديداتتى تىركەدى. ولاردىڭ ىشىندە «Nur Otan» پارتياسىنان قاسىم-جومارت توقاەۆ، «ۇلت تاعدىرى» ۇلتتىق-پاتريوتتىق قوزعالىسى ۇسىنعان كانديدات ءامىرجان قوسانوۆ، «اۋىل» حالىقتىق-دەموكراتيالىق پاتريوتتىق پارتياسىنان تولەۋتاي راحىمبەكوۆ، قازاقستاننىڭ كوممۋنيستەر پارتياسىنان جامبىل احمەتبەكوۆ، «ۇلى دالا قىراندارى» رەسپۋبليكالىق قوزعالىسىنان ءسادى-بەك تۇگەل، قازاقستان رەسپۋبليكاسىنىڭ كاسىپوداقتار فەدەراتسياسىنان امانگەلدى تاسپيحوۆ جانە «اق جول» قازاقستاننىڭ دەموكراتيالىق پارتياسىنان دانيا ەسپاەۆا بار.

"The Qazaq Times"