كۋشنەر بەيبىتشىلىك جوسپارىن جاريا ەتتى. فوتو: VOA.

قىتاي مەن رەسەي ۇكىمەتتەرى قۇراما شتات باس بولىپ ۇيىمداستىرعان يزرايل-پالەستينا بەيبىتشىلىك جوسپارىنىڭ ەكونوميكالىق ءبولىمى سانالاتىن "ماناما سامميتىنە" بويكوت جايالاۋ تۋرالى كەلىسكەن. بۇل مالىمەتتى پالەستيناداعى قىتاي وكىلى پالەستينا ۇكىمەت جەتەكشىسىنىڭ حالىقارالىق ىستەر جونىندەگى كەڭەسشىسى نابيل شاسپەن كەزدەسۋدە ورتاعا سالعان. اقش باس بولىپ ۇيىمداستىرعان اتالعان سامميت باحرەيندە وتكىزىلەدى دەپ جوسپارلانعان بولاتىن. 

پالەستينانىڭ اقپارات قۇرالدارىنىڭ حابارىنا قاراعاندا، قىتاي وكىلى گۋو ۆەي بەيجىڭنىڭ شىعىس يەرۋساليمدى استانا ەتكەن جانە 1967 جىلعى شەكاراعا ساي تاۋەلسىز پالەستينا مەملەكەتىنىڭ قۇرىلۋىن قولدايتىنىن جەتكىزگەن. الايدا، يزرايل ۇكىمەتى شىعىس يەرۋساليمدى ءوزىنىڭ استاناسى رەتىندە قاراستىرادى. اقش پرەزيدەنتى ترامپتىڭ شىعىس يەرۋساليمدى يزرايل استاناسى رەتىندە مويىنداۋ تۋرالى شەشىمى حالىقارالىق داۋ تۋعىزعان ەدى.

وتكەن اپتادا ترامپ ۇكىمەتىنىڭ لاۋازىمدى تۇلعالارى، "عاسىر كەلىسىمى" دەپ اتالاتىن اقش-يزرايل بەيبىتشىلىك جوسپارىن جاريالادى. سونداي-اق، يزرايل مەن پالەستينا بەيبىتشىلىك جوسپارىن ەكونوميكالىق ءبولىمىن تالقىلاۋ ءۇشىن باحرەين ورتالىعى ماناماعا سامميت ۇيىمداستىراتىنىن جەتكىزگەن. بۇل سامميتتە اق ءۇيدىڭ جوعارى كەڭەسشىسى ءارى پرەزيدەنتى ترامپتىڭ كۇيەۋ بالاسى كۋشنەر مەن اقش-تىڭ ورتا-شىعىستاعى ارنايى وكىلدەرى قاتىسادى.

ساۋد ارابياسى، بىرىككەن اراب امىرلىگى جانە وزگە بىرقاتار ەلدەر اتالعان سامميتكە وكىلدەرىن جىبەرەتىنىن مالىمدەدى. سونداي-اق، باحرەيندەگى باس قوسۋعا كەيبىر ەلدەردىڭ قارجى سالاسىنداعى لاۋازىمدىلارى مەن ىسكەر توپ جەتەكشىلەرى قاتىسادى دەپ كۇتىلۋدە.

پالەستينانى ازات ەتۋ ۇيىمى اقش پەن يزرايل ورتاسىندا عانا جاسالعان اتالمىش جوبا جانە ونىڭ سامميتىنە قاتىسپايتىنىن، سونداي-اق، قاندايدا ءبىر شەشىمىن مويىندامايتىنىن بىلدىرگەن بولاتىن. پالەستينا ۇكىمەتىنىڭ باسشىلارى بۇل سامميت تۋرالى پىكىر ءبىلدىرىپ، "ماناما ءسامميتى" پالەستينا مەن يزرايل قاقتىعىسىنىڭ نەگىزگى سەبەپتەرىن، ايتالىق، سوڭعى شەكارا، يەرۋساليم مارتەبەسىن جانە پالەستينا حالقىنىڭ تاعدىرى تۋرالى تالقىعا سالمايتىنىن سىنعا الدى. ولاردىڭ ايتۋىنشا يزرايل مەن پالەستينا اراسىندا بەيبىتشىلىك ورناتۋدىڭ نەگىزى وككۋپاتسيانى توقتاتىپ، ەڭ ماڭىزدى ساياسي ماسەلەلەردى شەشۋى بولىپ تابىلادى.

“The Qazaq Times”