يەرۋساليمدە جانجال. فوتو: ءال-جازيرا.

يەرۋساليم قالاسىندا تاعى دا جانجال. ونداعى يسلام قورلارى جۇزدەن استام ەۆرەي ازاماتى ءال-اقسا مەشىتىنە كۇشپەن باسىپ كىرگەنىن مالىمەدى.

يەرۋساليمدەگى يسلام قورلارىنىڭ تاراتقان مالىمەتىنە قاراعاندا، يزرايل پوليتسياسىنىڭ قولداۋىنا سۇيەنگەن 116 ەۆرەي ازاماتى ءال-اقسا مەشىتىنە كۇشپەن باسىپ كىرىپ، ونداعى مۇسىلمانداردىڭ قارسىلىعىنا تاپ بولعان. يسلام قورلارى ەۆرەي ازاماتتارىنىڭ ارەكەتتەرىن ماقساتتى ارانداتۋشىلىق دەپ ايىپتاعان.

يزرايل رەسميلەرى بەرگەن تۇسىنىكتەمەدە ەۆرەي ازاماتتارى ءال-اقساعا تۋريستىك ماقساتتا كىرگەنىن ايتقان. الايدا، بۇنداي ارەكەت ءبىر كۇن ىشىندە بىرنەشە رەت قايتالانعان.

ءال-اقسا مەشىتى مۇسىلاندار جاعىنان كيەلى ورىن سانالادى. ەۆرەيلەر ءۇشىن دە تاريحي سيمۆولدىق ءمانى بار. سوڭعى كەزدە ءال-اقسا مەشىتىنە كىرۋ بويىنشا شىعىس يەرۋساليمدەگى مۇسىلماندار مەن ەۆرەيلەر اراسىندا جانجال اۋىق-اۋىق قايتالانۋدا. بۇل ونسىزدا ناشار كۇيدەگى يزرايل مەن پالەستينا قاتىناستى ودان ارمان ۋشىقتىرىپ كەلەدى.

“The Qazaq Times”