گەرمانيانىڭ فەدەرالدى پرەزيدەنتى فرانك-ۆالتەر شتاينمايەر جانە وزبەكستان پرەزيدەنتى شاۆكات ميرزيەەۆ. فوتو: http://www.uza.uz

گەرمانيانىڭ فەدەرالدى پرەزيدەنتى فرانك-ۆالتەر شتاينمايەر شاۆكات ميرزيەەۆتىڭ شاقىرتۋىمەن وزبەكستانعا باردى.

وزبەكستان پرەزيدەنتى ءباسپاسوز قىزمەتىنىڭ حابارلاۋىنشا، ەكى ەل باسشىلارى ساياسي، ساۋدا-ەكونوميكالىق، ينۆەستيتسيالىق، مادەني-گۋمانيتارلىق سالالارداعى ەكىجاقتى ىنتىماقتاستىقتى ودان ءارى كەڭەيتۋ پەرسپەكتيۆالارىن جانە ەۋروپالىق وداقپەن بايلانىستى تالقىلايدى. سونداي-اق حالىقارالىق جانە وڭىرلىك كۇن تارتىبىندەگى وزەكتى ماسەلەلەر بويىنشا پىكىر الماسۋ جوسپارلانعان.

كەزدەسۋ اياسىندا ف.شتاينمايەردىڭ وزبەكستان مەن گەرمانيانىڭ جەتەكشى كومپانيا، بانكتەرىنىڭ وكىلدەرىمەن كەزدەسۋى، بىرقاتار ونەركاسىپتىك جانە باسقا دا وبەكتىلەرگە بارۋ جوسپارلانعان. ساپاردىڭ كەلەسى كۇنىندە گەرمانيا پرەزيدەنتى حورەزم وبلىسىنا بارىپ، ۇرگەنىش مەملەكەتتىك ۋنيۆەرسيتەتىنىڭ وقىتۋشىلارى مەن ستۋدەنتتەرىمەن كەزدەسەدى. مۇنىمەن قاتار، حيۋانىڭ تاريحي جانە ساۋلەتتىك كورىكتى جەرلەرىمەن تانىسپاق.

27-29 مامىر ارالىعىندا جالعاساتىن ساپار قورىتىندىسى بويىنشا ەكونوميكا، قارجى، ءبىلىم بەرۋ، دەنساۋلىق ساقتاۋ جانە قورشاعان ورتانى قورعاۋ سالالارىنداعى ەكىجاقتى قاتىناستاردى ودان ءارى تەرەڭدەتۋگە باعىتتالعان كەلىسىمدەرگە قول قويىلماق.

"The Qazaq Times"