وزبەكستان ەمدەۋدەن وتپەگەندەردى جۇمىستان قۋاتىن زاڭ شىعاردى

وزبەكستاندا ەندى ەكپە ەكتىرمەگەن قىزمەتكەرلەر قىزمەتىنەن قۋىلادى. پرەزيدەنت شاۆكات ميرزيەەۆ بۇنداي شەشىمگە جول بەرەتىن زاڭعا قول قويدى. زاڭ جوباسى تۋرالى وزبەكستان پارلامەنتى مەن ۇكىمەتىنىڭ «ۇلت اۋازى» اتتى رەسمي باسىلىمى ءبىرىنشى بولىپ حابار تاراتتى.

جاڭا زاڭعا لايىقتاپ ءور ەڭبەك كودەكسىنىڭ 113 بابىنا بەلگىلى وزگەرىستەر ەنگىزىلگەن. وعان سايكەس ەلدە جۇعىمتال ىندەت تاراپ جاتقان جاعدايدا پروفيلاكتيكالىق ۆاكتسينادان وتپەگەن ادامعا جۇمىس بەرۋشى جۇمىسقا كىرگىزبەۋگە، ونى قىزمەتتەن قۋعا قۇقىلى.

بۇعان قوسا، اتالعان كودەكستىڭ 28 بابىنادا وزگەرىستەر ەنگىزىلىپ، وزبەكستاننىڭ باس سانيتارىنىڭ شەشىمىمەن قاۋىپتى ينفەكتسيالار كەزىندە كارانتين شارتتارى بەكىتىلەدى. سونداي-اق، باس سانيتار شەشىمىمەن مىندەتتى جاپپاي ەمدەۋ كىرگىزىلەدى.

بۇعان دەيىن مىندەتتى ەمدەۋگە وزبەكستان رەسپۋبليكاسىنىڭ زاڭى مۇمكىندىك بەرمەي كەلگەن. پارلامەنت دەپۋتاتتارى بۇنداي زاڭ جوباسىن ماۋسىم ايىندا قاراپ شىقتى.

ەلدە قۇرىلعان كوروناۆيرۋسقا قارسى كۇرەس بويىنشا ارنايى كوميسسيا 17 شىلدەدەن باستاپ ءبىلىم بەرۋ، مەديتسينا تارماعى، مەملەكەتتىك قىزمەتكەرلەر مەن ساۋدا ورتالىقتارىنىڭ جۇمىسشىلارىنا مىندەتتى ەمدەۋ جۇكتەدى.

“The Qazaq Times”