بيىل قازاقستان مەن تۇركيا تاۋار اينالىمى 50%-عا ارتقان. بۇل تۋرالى ءسىم ءباسپاسوز قىزمەتى حابارلادى.

قر سىرتقى ىستەر ءمينيسترى بەيبىت اتامقۇلوۆ پەن تۇركيا سىرتقى ىستەر ءمينيسترى مەۆليۋت چاۆۋشوعلۋ ستراتەگيالىق جوسپارلاۋ جونىندەگى بىرلەسكەن توبىنىڭ V وتىرىسىنىڭ قورىتىندىلسى بويىنشا كەزدەسۋ ۇيىمداستىردى. جيىن بارىسىندا قوس تاراپ تاۋارلىق اينالىم جانە ديپلوماتيالىق بايلانىستى تالقىعا سالىپ، ەكىجاقتى قارىم-قاتىناستاعى ستراتەگيالىق جەتىستىكتىڭ 10 جىلدىعىنا توقتالىپ ءوتتى. ب.اتامقۇلوۆ سوزىندە: "بۇگىن مەۆليۋت چاۆۋشوعلۋمەن وتە جەمىستى كەزدەسۋ وتكىزدىك. قازاق حالقى مەن تۇرىك حالقى تامىرى تەرەڭ تارتقان ۇلى بايتەرەكتىڭ ەكى ۇلكەن بۇتاعى ىسپەتتى. قازاقستان ازاتتىق العاننان كەيىن ەكى ەل اراسىنداعى ىنتىماقتاستىق بىردەن قارقىندى دامي باستادى. بۇگىندە قازاقستان مەن تۇركيا ساياسي، ساۋدا-ەكونوميكالىق، مادەني-گۋمانيتارلىق، اسكەري جانە باسقا سالالاردا بەلسەندى تۇردە ىنتىماقتاستىق جۇرگىزۋدە", - دەپ مالىمدەدى.

الداعى ۋاقىتتا ەكى ەل «جاڭا سينەرگيا» بىرلەسكەن ەكونوميكالىق باعدارلاماسىن ىسكە اسىرۋ ماقساتىندا ءبىرشاما ءىس-شارالاردى جۇزەگە اسىرماق.

ايتا كەتەيىك، قازىرگى ۋاقىتتا قازاقستاندا تۇرىك كاپيتالىنىڭ قاتىسۋىمەن 2200-دەن استام كاسىپورىن جۇمىس ىستەيدى. بيىلعى جىلدىڭ العاشقى توقسانىندا ەكىجاقتى تاۋار اينالىمى الدىڭعى جىلمەن سالىستىرعاندا 50%-دان اسىپ، 632 ملن دوللارعا جەتكەن.

"The Qazaq Times"