امەريكالىقتاردىڭ جارتىسى اقش پەن يران قاقتىعىسى سوعىسقا ۇلاسادى دەگەن ويدا.

Ipsos كومپانياسىنىڭ ساۋالناماسىنا قاتىسقان ازاماتتاردىڭ 51%-ى وسىنداي بولجام جاساعان. پىكىر بىلدىرگەندەردىڭ 60%-ى سوعىستى ءبىرىنشى بولىپ يران باستايدى دەيدى. سونىمەن قاتار، 70% تۇرعىن يران ءبىرىنشى بولىپ سوققى جاساعان جاعدايدا، اقش ەسەسىن قايتارىپ، سوققى جاساۋعا ءتيىستى ەكەندىگىن ايتقان. ال 39%-ى اقش يرانعا قارسى اۋقىمدى سوعىس وپەراتسياسىن جۇزەگە اسىرۋى ءتيىس دەسە، جالپى قاتىسۋشىلاردىڭ 53%-ى تەھران بيلىگىن اقش-قا قاۋىپ ءتوندىرۋشى كۇش دەپ ەسەپتەيدى.

سوڭعى ۋاقىتتا ۋاشينگتون مەن تەھران بايلانىسى ۋشىعا ءتۇستى. مامىردا ترامپ اق ۇيدە رەسمي مالىمدەمە جاساپ: «يران تەرروريزمدى دەمەۋشى مەملەكەت. بۇل ءۇشىن ءوز حالقىنىڭ الەۋەتىن پايدالانىپ وتىر. يران رەجيمى «حيزبۋللا»، «حامماس»، «تاليبان»، «ءال-كايدا» ۇيىمدارىنىڭ قولداۋشىسى»، – دەگەن. ال يران يادرولىق كەلىسىمى تۋرالى سوزىندە: «بۇل كەلىسىم ادامدى ۇيالتاتىن بىرجاقتى كەلىسىم. ەگەر مەن بۇل يادرولىق كەلىسىمگە رۇقسات بەرسەم، تاياۋ شىعىس قارۋلانادى. بۇل كەلىسىم يراننىڭ وڭىردەگى امبيتسياسىن توقتاتا المايدى، يراننىڭ يادرولىق قارۋىن بۇل شىرىگەن كەلىسىممەن جوعالتا المايمىز»، – دەپ جاۋاپ قايتاردى.

ترامپ وسى ايىپتاۋلاردان كەيىن اسا ماڭىزدى شەشىمىن جاريا ەتىپ، يادرولىق كەلىسىمىنەن باس تارتاتىنىن جانە يرانعا باعىتتالعان سانكتسيالاردىڭ قايتا ىسكە قوسىلاتىنىن مالىمدەگەن. ەكەۋارا ديالوگ داۋعا ۇلاسقان تۇستا، يران تاراپى يادرولىق كەلىسىمدەگى بىرقاتار تالاپتاردى ورىنداۋدان باس تارتتى. اسىرەسە، ۋران بايىتۋعا قاتىستى مىندەتتەمەلەردى ورىنداۋعا ءتيىس ەمەستىگىن العا تارتتى. ياعني اقش  يادرولىق كەلىسىمنەن شىعىپ، سانكتسيالاردى كۇشەيتەتىن بولعاندىقتان وسىنداي قادامعا باراتىنىن جەتكىزدى. بۇل رەتتە رەسمي تەھران يادرولىق كەلىسىم داۋىنا قاتىستى گەرمانيا، فرانتسيا، ۇلىبريتانيا، قىتاي جانە رەسەيگە ماسەلەنى رەتتەۋ ءۇشىن 60 كۇن ۋاقىت بەرىپ وتىر.

"The Qazaq Times"