قىرعىزستان بيلىگى 22 مامىردا تاجىكستان اۋماعىنان 150 مەتر قاشىقتىقتا ورنالاسقان ەسكى مازاردا جانجال ورىن الدى دەپ حابارلادى.

اتالعان ۋچاسكە ءالى رەسمي بەكىتىلمەگەن. بىراق ول جەردى قىرعىز ازاماتتارى پايدالانىپ كەلەدى.

قىرعىزستان مەملەكەتتىك شەكارا قىزمەتىنىڭ مالىمەتى بويىنشا، 22 مامىردا باتكەن وبلىسىنداعى ەسكى مازاردا جاقىندا جەرلەنگەن جەرگىلىكتى تۇرعىنعا ارناپ قۇران وقىلىپ جاتقان. "وسى كەزدە تاجىكستان شەكاراشىلارى كەلىپ، شەكارا ماڭىنان كەتۋدى تالاپ ەتكەن. وسىدان كەيىن شەكاراشىلار مەن تۇرعىندار سوزگە كەلىپ قالعان. تاجىك شەكاراشىلارى اۋەگە وق اتقان", - دەپ حابارلايدى قىرعىز شەكارا قىزمەتى.

ال يسفارا اكىمشىلىگىنىڭ ءباسپاسوز حاتشىسى يكبول يليوسزودا قىرعىز شەكاراشىلارى تاجىك اۋماعىنا ادەيىلەپ كىردى دەپ وتىر. ول الەۋەمەتتىك جەلىلەردە جاريالانعان ۆيدەولاردى كورسەتىپ، "ۆيدەودان قىرعىز شەكاراشىلارى جەرگىلىكتى تۇرعىندارعا ەگىنشىلىكپەن اينالىسۋعا مۇمكىندىك بەرمەي جاتقانىن كورۋگە بولادى" دەيدى.

قازىر ەكى ەلدىڭ شەكاراشىلارى ارسىندا كەلىسسوز ءجۇرىپ جاتىر. شەكارا ماڭىنداعى تۇرعىندار باتكەن جانە سوعدى وبلىسى باسشىلارىنىڭ كەلۋىن تالاپ ەتۋدە.

قىرعىزستان مەن تاجىكستان شەكاراسى 970 شاقىرىمدى الىپ جاتىر. ونىڭ تەك 519 شاقىرىمى عانا بەكىتىلگەن.

"The Qazaq Times"