پرەزيدەنتتىككە ۇمىتكەرلەر قانشا قارجى جۇمسادى؟

ورتالىق سايداۋ كوميسسياسى كانديداتتار قورىنىڭ قانشا قارجى جيناپ، قانشا قارجى جۇمساعانىن جاريالادى.

قاسىم-جومارت توقاەۆ سايلاۋ الدى قورىنا وسى ۋاقىتقا دەيىن 1 ميلليارد تەڭگە جينالعان. ونىڭ 510 ميلليونى «نۇر وتان» پارتياسىنىڭ جەكە قارجىسى. قالعان 514 ميلليونى جەكەلەگەن ازاماتتاردىڭ كومەك رەتىندە بەرگە قارجىسى. توقاەۆ شتابى سايلاۋ الدى ۇگىت-ناسيحات جۇمىستارىنا 185,6 ميلليون تەڭگە جۇمساعان.

«ۇلت تاعدىرى» قوزعالىسىنىڭ اتىنان سايلاۋعا ءتۇسىپ جاتقان ءامىرجان قوسانوۆتىڭ سايلاۋ الدى قورىنا 76,6 ميلليون تەڭگە تۇسكەن. ونىڭ ىشىندە 76 ميلليون تەڭگە كانديدات مەن قوزعالىسقا ۇگىت-ناسيحات جۇمىستارىن جۇرگىزۋگە بولىنگەن قارجى. قالعان 643 مىڭ تەڭگە حالىقتىڭ كومەگى. وسى كۇنگە دەيىن ۇگىت-ناسيحات جۇمىستارىنا 53 ميلليون تەڭگە جۇمسالعان.

«اق جول» پارتياسىنىڭ ۇمىتكەرى دانيا ەسپاەۆانىڭ قورىنا 113 ميلليون تەڭگە جينالعان. قۇجاتتا قارجىنىڭ بارلىعى حالىقتان كومەك رەتىندە جينالعان دەلىنگەن. بۇگىنگى تاڭدا ۇگىت-ناسيحات جۇمىستارىنا 109,5 ميلليون تەڭگە جۇمسالعان.

قازاقستان كوممۋنيستىك حالىقتىق پارتياسىنىڭ وكىلى جامبىل احمەتبەكوۆتىڭ قورىندا 338 ميلليون تەڭگە بار. ونىڭ 250 ميلليونى پارتيا مەن كانديداتتىڭ قارجىسى بولسا، قالعان 88 ميلليونى حالىقتىق كومەكتەن جينالعان. ۇگىت-ناسيحات جۇمىستارىنا 290 ميلليون تەڭگە جۇمسالعان.

«اۋىل» پارتياسىنىڭ ۇمىتكەرى تولەۋتاي راحىمبەكوۆتىڭ قورىندا 108 ميليون تەڭگە بار. جينالعان قارجىنىڭ بارلىعى كانديدات پەن پارتيانىڭ جەكە قارجىسى. وسى كۇنگە دەيىن ۇگىت-ناسيحات جۇمىستارىنا 77,5 ميلليون تەڭگە جۇمسالعان.

كاسىپوداقتار فەدەراتسياسى اتىنان سايلاۋعا قاتىسىپ جاتقان امانگەلدى تاسپيحوۆتىڭ سايلاۋ الدى ۇگىت-ناسيحات قورىنا 101,8 ميلليون تەڭگە جينالعان. قارجىنىڭ بارلىعى حالىق كومەگى. 75,2 ميلليون تەڭگە اگيتاتسيالىق جۇمىستارعا جۇمسالعان.

«ۇلى دالا قىراندارى» قوزعالىسى اتىنان سايلاۋعا ءتۇسىپ جاتقان سادىبەك تۇگەلدىڭ قورىندا 76,1 ميلليون تەڭگە بار. ونىڭ ىشىندە 200 مىڭ تەڭگە كانديدات پەن قور قارجىسى. قالعان 75,9 ميلليون كومەكتەن تۇسكەن قاراجات. ۇگىت-ناسيحات جۇمىستارىنا 76 ميلليون تەڭگە جۇمسالعان.

سايلاۋ الدى ۇگىت-ناسيحات جۇمىستارى مامىر ايىنىڭ 12-ءى كۇنى باستالعان. ول ماۋسىمنىڭ 8-ىنە دەيىن جالعاسادى. كەزەكتەن تىس پرەزيدەنت سايلاۋى ماۋسىم ايىنىڭ 9-ى كۇنى بولادى.

"The Qazaq Times"