فوتو: https://aif

بۇگىن ءيزرايلدىڭ جاڭا پرەزيدەنتىن سايلاۋ ەل پارلامەنتى سانالاتىن كنەسسەتتە وتەدى. شىلدەنىڭ ءبىرىنشى ونكۇندىگىندە سايلانعان كانديدات رەۆەن ءريۆليننىڭ ورنىنا كەلەدى جانە ەۆرەي مەملەكەتىنىڭ 11-ءشى باسشىسى بولادى.

پرەزيدەنتتىككە ەكى كانديدات بار. بۇل 2018 جىلدان باستاپ يزرايلدەگى «سوحنۋت» ەۆرەي اگەنتتىگىنىڭ جەتەكشىسى يتسحاك گەرتسوگ جانە ەل تاريحىندا پرەزيدەنتتىككە ەكىنشى ايەل كانديدات ميريام پەرەتس. 2018 جىلى ول «يزرايل رۋحىن نىعايتۋعا» قوسقان ۇلەسى ءۇشىن ماراپاتتالعان.

قازىرگى پرەزيدەنت رەۆەن ءريۆليننىڭ وكىلەتتىك مەرزىمى 9 شىلدەدە اياقتالادى. زاڭ بويىنشا ونىڭ مۇراگەرىن سايلاۋ وسى كۇنگە دەيىن 30 كۇننەن كەشىكتىرىلمەي وتكىزىلۋى كەرەك.

يزرايلدە پرەزيدەنتتىك وكىلەتتىكتى ورىنداۋدىڭ جەتى جىلدىق مەرزىمى بەلگىلەنگەن. مۇندا مەملەكەت باسشىسى لاۋازىمىن ەكى رەت اتقارۋعا بولمايدى. ەگەر دەپۋتاتتاردىڭ تورتتەن ءۇش بولىگى يمپيچمەنت ءۇشىن داۋىس بەرسە، پارلامەنت پرەزيدەنتتى قىزمەتىنەن شەتتەتە الادى.

زاڭ بويىنشا پرەزيدەنتتىككە كانديداتتاردى 19 مامىرعا دەيىن دەپۋتاتتار ۇسىنا الادى، ولاردىڭ ارقايسىسى كەمىندە 10 پارلامەنتشىنىڭ قولداۋىنا يە بولۋى كەرەك. پرەزيدەنتتى كنەسسەت جاسىرىن داۋىس بەرۋ ارقىلى جەتى جىلدىق مەرزىمگە قايتا سايلاۋ قۇقىعىنسىز سايلايدى. 61 داۋىس جيناعان كانديدات جەڭىسكە جەتەدى.

قاجەت بولعان جاعدايدا ەكىنشى تۋر وتكىزىلەدى، وعان ءبىرىنشى تۋردا ەڭ كوپ داۋىس العان ەكى كانديدات قاتىسادى. ەگەر كانديداتتار ەكىنشى تۋردا بىردەي داۋىس سانىن جيناعان بولسا، وندا قايتا داۋىس بەرۋ وتكىزىلەدى.

يزرايل پرەزيدەنتى زاڭ بويىنشا كنەسسەت دەپۋتاتتارىنىڭ بىرىنە پارلامەنتتىك سايلاۋ قورىتىندىلارى بويىنشا ۇكىمەت قۇرۋدى تاپسىرادى، سونداي-اق وكىلدىك فۋنكتسيالاردى ورىندايدى. قابىلدانعان زاڭدارعا قول قويادى جانە كەشىرىم جاساۋعا قۇقىلى.

"The Qazaq Times"