فوتو: https://www.dw.com

Google كومپانياسى قىتايلىق Huawei كاسىپورنىمەن ءوزارا بايلانىسىن توقتاتتى. Reuters اگەنتتىگىنىڭ حابارلاۋىنشا، اقش ۇكىمەتى Huawei كومپانياسىن قارا تىزىمگە ەنگىزگەننەن كەيىن Google وسىنداي شەشىمگە كەلگەن.

كومپانيانىڭ رەسمي وكىلى: «ءبىز بۇيرىققا سايكەس ارەكەت ەتىپ، ونىڭ سالدارىن زەردەلەپ جاتىرمىز. Google Play قوسىمشاسى Google Play Protect قورعانىسى قولدانىستاعى Huawei قۇرىلعىلارىندا جۇمىس ىستەي بەرەدى. Huawei-ءدىڭ الداعى ۋاقىتتا شىعاتىن Android-تا جۇمىس ىستەيتىن سمارتفوندارى Google Play Store, Gmail جانە YouTube سياقتى تانىمال رەسۋرستارىن اشا المايدى. Huawei ءۇشىن Android-ءتىڭ تەك جالپىعا ارنالعان جۇكتەمەلەرى عانا قولجەتىمدى بولادى»، – دەپ مالىمدەدى. Huawei بۇرىنعىداي Google قوسىمشالارىن جۇكتەپ، ولاردى ۇدايى جاڭارتا الادى. دەگەنمەن، بۇل قادام قىتايلىق كومپانيانىڭ  قىتاي اۋماعىنان تىس جەرلەردە سمارتفون ءوندىرۋ بيزنەسىنە كەدەرگى بولماق.

1 جەلتوقساندا Huawei كومپانياسى باسشىسىنىڭ قىزى جانە قارجى ديرەكتورى مىڭ ۆانجوۋ ۋاشينگتوننىڭ سۇراۋى بويىنشا كانادا مەملەكەتىندە تۇتقىندالعان بولاتىن. رەسمي ۋاشينگتون اتالعان ايىپتاۋلاردا Huawei كومپانياسى اقش بيلىگىنىڭ يرانمەن بايلانىسىنا قاتىستى ەكى ەنشىلەس كومپانيالارمەن، «Huawei Device USA» جانە «Skycom Tech» قارىم-قاتىناستارىنا قاتىستى جالعان اقپارات تاراتىپ كەلگەنىن ايتتى. بۇدان وزگە ايىپتاۋعا سايكەس، قىتايلىق كومپانيا امەريكالىق T-Mobile تەحنولوگياسىن ۇرلاعان. اقش ساۋدا ءمينيسترى ۋيلبۋر روسس Huawei-گە قاتىستى ايىپتاۋ اقش پەن قىتاي اراسىنداعى ساۋدا قاتىناسىنا ەشقانداي قاتىسى جوق دەپ مالىمدەدى. كەيىننەن، 16 مامىردا اقش پرەزيدەنتىنىڭ اكىمشىلىگى Huawei Technologies Co Ltd كومپانياسىن قارا تىزىمگە ەنگىزدى.

Huawei – قىتايدا «ۇلتتىق چەمپيون» دەگەن اتاققا يە بولعان كومپانيا. ونىڭ ماقساتى – تەحنيكالىق سالادا كوشباسشى بولۋ. الايدا، سوڭعى جىلدارى قىتايلىق كومپانياعا الاياقتىق باپتارىنا سايكەس بىرنەشە ايىپتار تاعىلىپ، الەمدىك ارەناداعى بەدەلىنە نۇقسان كەلدى. اقش-تىڭ قارجى مينيسترلىگى ۇسىنعان ايىپتاۋلار ەڭ ماڭىزدى، ءارى كۇردەلىسى جانە بۇل ءىس ەكى ەل اراسىنداعى ساۋدا سوعىسىن تۇتاندىرۋشى بولىپ سانالادى.

"The Qazaq Times"