فوتو: ازاتتىق راديوسى

قر باس پروكۋرورىنىڭ ورىنباسارى ب.دەمباەۆتىڭ «پروكۋراتۋرا تۋرالى» زاڭنىڭ 31-بابىنىڭ تارتىبىندە جاساعان ۇندەۋى رەسمي prokuror.gov.kz سايتىندا جاريالاندى.

ۇندەۋدە «الەۋمەتتىك جەلىلەر مەن مەسسەندجەرلەردە 9 مامىردا زاڭسىز ميتينگكە قاتىسۋعا ۇگىتتەۋدە. باس پروكۋراتۋرا بۇدان بۇرىن وسىنداي زاڭسىز جاريالى اكتسيالار ۇيىمداستىرعانى جانە قاتىسقانى ءۇشىن جاۋاپتىلىقتى ەسكەرتكەن بولاتىن. وسىعان بايلانىستى ميتينگىلەر ۇيىمداستىرۋدىڭ جانە وتكىزۋدىڭ زاڭدى ءتارتىبىن بۇزۋعا جول بەرىلمەيتىنىنە نازار اۋدارامىز. قۇقىق بۇزۋشىلىققا كىنالىلەر زاڭ الدىندا قاتاڭ جاۋاپ بەرەتىن بولادى. قوعامدىق قاۋىپسىزدىك پەن قۇقىقتىق ءتارتىپتى قامتاماسىز ەتۋ، سونداي-اق ازاماتتاردىڭ قۇقىقتارى مەن بوستاندىقتارىن قورعاۋ ماقساتىندا باس پروكۋراتۋرا ارانداتۋشىلىققا بەرىلمەۋگە جانە مەملەكەتتىڭ زاڭدارىن بۇزباۋعا شاقىرادى»، – دەلىنگەن. سونىمەن قاتار، باس پروكۋراتۋرا «قۇقىق بۇزۋشىلىققا كىنالىلەر زاڭ الدىندا قاتاڭ جاۋاپ بەرەتىن بولادى» دەپ ەسكەرتتى.

1 مامىردا قازاقستاننىڭ بىرنەشە قالالارىندا بيلىككە قارسى نارازىلىق شارالارى وتكەن بولاتىن. نارازى توپ «ءبىزدىڭ ءوز تاڭداۋىمىز بار!»، «نۇر-سۇلتان استانامىز ەمەس!»، «حالىق پىكىرىمەن ساناسىڭىزدار»، «كوپ بالالى انالارعا جاردەم بەرىلسىن!»، «شىندىقتان قاشىپ قۇتىلا المايسىڭ!» دەپ ايقايلادى. سونىمەن قاتار، شەرۋگە شىققاندار اەس قۇرىلىسىنىڭ جۇزەگە اسپاۋىن تالاپ ەتىپ، الدا كەلە جاتقان كەزەكتەن تىس پرەزيدەنتتىك سايلاۋعا بويكوت جاريالاعان. سول كۇنى ىشكى ىستەر مينيسترلىگى ميتينگكە شىققان 80 ادامنىڭ ۇستالعانىن حابارلادى. ۇستالعانداردىڭ ۇستىنەن اكىمشىلىك ءىس قوزعالىپ، كەي ازاماتتارعا «بەيبىت جيىن وتكىزۋ ءتارتىبىن بۇزدى» دەگەن ايىپپەن 20اەك كولەمىندە ايىپپۇل سالىنعان.

"The Qazaq Times"