پاكىستاندا ادام ساۋداسىمەن اينالىسقان 10 قىتايلىق تۇتقىندالدى. ولارعا پاكىستاندىق جاس قىزداردى كۇشتەپ نەكەگە تۇرعىزعان جانە قىتايدا جەزوكشەلىكپەن شۇعىلدانۋعا ماجبۇرلەگەن دەگەن ايىپتار تاققان.

بۇنداي مالىمەتتى پاكىستاننىڭ پەنجاپ پروۆينتسياسىنىڭ ورتالىعى لاحور قالاسىنداعى تەرگەۋ جونىندەگى فەدەرالدىق بيۋروسى مالىمدەگەن. اتالعان قۇزىرلى ورگاننىڭ اعا قىزمەتكەرى جۋرناليستەرگە، جەزوكشەلىك جانە ادام ساۋداسىمەن اينالىساتىن قىلمىستىق توپتى تەكسەرىپ تاپقانىن جەتكىزگەن. مالىمەتتە ايتىلۋىنشا، قىلمىستىق توپ قۇرامىندا 10 قىتاي ازاماتى جانە 4 پاكىستاندىق بار.

تۇتقىندالعان قىتايلار. فوتو: The News Tribe.

ۇيىمداسقان قىلمىستىق توپ جاس قىزداردى قىتايلىق ازاماتتارعا ءماجبۇرلى جانە الداپ-ارباۋ ارقىلى نەكەگە تۇرعىزعان. سوڭىنان ولاردى ىشكى قىتاي قالالارىندا جەزوكشەلىكپەن اينالىسۋعا يتەرمەلەگەن. فەدەرالدىق تەرگەۋ بيۋروسىنىڭ وكىلدەرى جاساعان مالىمدەمەدە، قاماۋعا الىنعاندار اراسىندا ءبىر قىتايلىق جانە ءبىر پاكىستاندىق «جەڭگەتاي» ايەلدەر دە بار.

قىتايدىڭ يسلامابادتاعى باس ەلشىلىگى قىلمىستىق ارەكەتكە قارسى تۇرۋ ءۇشىن پاكىستان قاۋىپسىزدىك كۇشتەرىنە قولداۋ كورسەتەتىنىن مالىمدەگەن. سونداي-اق، قىتايدىڭ اقپارات قۇرالدارى پاكىستانداعى قىلمىستىق توپتىڭ قىتايداعى سەرىكتەرى دە تۇتقىندالعانىن حابارلاعان.

پاكىستان تارابى قىلمىستىق توپ مۇشەلەرىن ۇستاپ، قىلمىستى ارەكەتتەردى اشۋ ءۇشىن قاۋىپسىزدىك قىزمەتكەرلەرىنە تۇراتىن ارنايى توپتى قىتايعا جىبەرۋگە دايىندالۋدا.

قىتاي ازاماتتارىمەن قاتىستى ادام ساۋداسى، ايەلدەردى جەزوكشەلىككە ماجبۇرلەۋ، ءماجبۇرلى نەكە جانە نەكە ساۋداسى سىندى ارەكەتتەرى بۇعان دەيىن قىتايعا كورشىلەس بىرنەشە ەلدە بولعان. ايتالىق، سولتۇستىك كورەيا، ۆەتنام ەلدەرىندە ءماجبۇرلى نەمەسە نەكە ساۋداسىمەن اينالىساتىن ارنايى «اگەنتتىكتەر» بار ەكەنى بەلگىلى بولعان. بۇل ەلدەردە قىتاي ازاماتتارىنا ءماجبۇرلى نەكەگە تۇرعان ايەلدەردىڭ سوڭىندا ادام ساۋداسىنىڭ قۇربانىنا اينالعاندارى دا بار.

 

“The Qazaq Times”