رەسەي ءسىم سەرگەي لاۆروۆ. فوتو: https://static.independent.co.uk

ۋاشينگتون ۆەنەسۋەلاداعى جاعدايعا ىقپالىن تيگىزبەۋى ءتيىس. رەسەيدىڭ سىرتقى ىستەر ءمينيسترى سەرگەي لاۆروۆ وسىلاي دەپ مالىمدەدى.

جاقىندا لاۆروۆ ۆەنەسۋەلا ءسىم حورحە اررەاسامەن ماسكەۋدە كەزدەسۋ وتكىزىپ، ماسكەۋ مەن كاراكاس بايلانىسىن تالقىلادى. لاۆروۆ مالىمدەمەسىندە: «اقش باسقارعان كامپانيا ۆەنەسۋەلا بيلىگىن قۇلاتۋ ءۇشىن قولدان كەلگەنىن جاساپ وتىر. بۇل كامپانيا بۇۇ بەكىتكەن جارعىداعى حالىقارالىق قۇقىقتىڭ نەگىزگى پرينتسيپتەرىن بۇزۋدا. مەن امەريكا تاراپى مەن ولارعا قولداۋ كورسەتىپ وتىرعان ەلدەردى زاڭ اياسىندا ارەكەت ەتۋگە شاقىرامىن»، – دەدى.

ال اقش-تىڭ مەملەكەتتىك حاتشىسى مايك پومپەو، كەرىسىنشە، ۆەنەسۋەلا ماسەلەسىنە ماسكەۋ ارالاسپاۋى كەرەك دەپ مالىمدەگەن. پومپەو ۆەنەسۋەلا داعدارىسى ۋشىقپاس ءۇشىن، ەلدە ءادىل سايلاۋ ءوتۋى ءتيىس جانە امەريكا قاشان دا دەموكراتيالىق مەملەكەتتەردى قولدايتىندىعىن ايتتى. ەندى ەكى مينيستر دۇيسەنبىدە فينليانديادا وتەتىن فورۋمدا كەزدەسپەك.

وسىعان دەيىن، ياعني 11 جەلتوقساندا رەسەيگە ۆەنەسۋەلا پرەزيدەنتى نيكولاس مادۋرو مەن قورعانىس مينيسترلىگىنىڭ باسشىسى لوپەس بارعان بولاتىن. رەسەي قورعانىس ءمينيسترى سەرگەي شويگۋ سول كەزدە رەسەي اسكەري اۆياتسياسىنىڭ ۆەنەسۋەلا اەرودرومدارىنا ۇشۋ پراكتيكاسى جالعاساتىنىن، ال رەسەي ۆمف كەمەلەرى وسى ەلدىڭ پورتتارىنا كىرەتىنىن مالىمدەگەن. سول ۋاقىتتان بەرى رەسەيلىك ۇشاقتار ۆەنەسۋەلا اسكەري قىزمەتشىلەرىمەن بىرلەسكەن وقۋ-جاتتىعۋلارعا قاتىسىپ كەلەدى.

وتكەن اپتادا وپپوزيتسيا جەتەكشىسى حۋان گۋايدو مادۋرونىڭ بيلىگىن اۋدارىپ تاستاۋعا ارەكەت ەتكەن، الايدا بۇل ارەكەتى ساتسىزدىككە ۇشىرادى. ونىڭ ناتيجەسىندە، وپپوزيتسيا مەن قارۋلى كۇش اراسىندا قارۋلى قاقتىعىس ورىن العان.

"The Qazaq Times"