الەمدە جۋرناليستەر ءۇشىن قاۋىپسىز ەلدەر بارعان سايىن ازايۋدا

«شەكاراسىز جۋرناليستەر» ۇيىمىنىڭ وتكەن ايدا جاريا ەتكەن مالىمەتىنە قاراعاندا، الەمدە جۋرناليستەر ءۇشىن قاۋىپسىز ەلدەر سانى ازايىپ بارادى. ەسەسىنە، اۆتوريتارلىق رەجيمدەردىڭ بۇقارالىق اقپارات قۇرالدارىنا قىسىم كورسەتۋى بارعان سايىن كۇشەيۋدە. الەم ەلدەرىندە اقيقاتتى اشقانى ءۇشىن ولتىرىلگەن جۋرناليستەر سانى دا كوبەيگەن.

1993 جىلى حالىقارالىق قاۋىمداستىق 3 ماي كۇنىن دۇنيەجۇزىلىك ءباسپاسوز ەركىندىگى كۇنى رەتىندە بەلگىلەگەن ەدى. ول كۇنى الەمدە قىزمەت بارىسىندا قازا تاپقان جۋرناليستەر ەسكە الىنادى. حالىقارالىق جۋرناليستيكا فەدەراتسياسىنىڭ مالىمەتىنە قاراعاندا بىلتىر 95 جۋرناليست قاستاندىقپەن ولتىرىلگەن.

بىلتىر سولاردىڭ اراسىندا بۇرىنعى ساۋد ارابيالىق جۋرناليست جامال حاشوگگيدىڭ ءولىمى الەمنىڭ نازارىن وزىنە اۋدارعان ەدى. ساۋد اۋلەتى بيلىگىنىڭ قاراڭعى قۇپيالارىن اشقان جۋرناليست ءبىر ادامنىڭ بۇيرىعىمەن، باسقا ەمەس سول ەلدىڭ تۇركياداعى ەلشىلىگىندە ءولتىرىلىپ، بورشالانعان دەنەسى ءار جەردەن تابىلعان ەدى. بۇل الەم جۇرتشىلىعىن ادىلەت پەن اقيقات ءۇشىن، جۋرناليستەردىڭ تاعدىرى ءۇشىن ويلانۋىنا تۇرتكى بولىپ ەدى. اتاعى اسپانداپ، الاپاسى ورلەپ تۇرعان مۇراگەر حانزادا مۇحاممەد وزىنە تاعىلعان ايىپتى مويىندامادى. الايدا، كوپتەگەن ەلدەر بۇل ءۇشىن ساۋد ارابياسىنىڭ ۇكىمەتىن جازعىردى.

ءبىر عانا حاشوگگي ەمەس، مالتادا جەمقورلىق تۋرالى زەرتتەۋ جۇرگىزگەن جاۋىنگەر جۋرناليست دافني كارۋانا گاليزيا دا اقيقات ءۇشىن كۇرەسكەن جۋرناليست رەتىندە ەلدىڭ قولداۋىنا يە بولدى. بۇلاردان تىس اۆتوريتارلىق رەجيمدەر جاعىنان اتىلعان، اسىلعان، سوتتالعان، تۇرمەلەنگەن جۋرناليستەر دە جەتەرلىك. تەررورلىق ۇيىمدار تارابىنان ىزدەۋ سالىنىپ، ازاپپەن ولتىرىلگەن رەپورتەر  سانى دا بىرنەشە ونداپ سانالادى.

بۇل ۇردىسكە بايلانىستى جۋرناليستەردىڭ حالىقارالىق فەدەراتسياسى مەن «شەكاراسىز جۋرناليستەر» ۇيىمى الەم جۇرتشىلىعىن جۋرناليستەردى قولداۋعا شاقىرعان.

“The Qazaq Times”