فوتو: https://sputniknews.kz

قازاقستان مەن اقش ۇكىمەتى اراسىندا كونسۋلدىق ارتىقشىلىقتار مەن يممۋنيتەتتەر تۋرالى كەلىسىمگە قول قويىلدى. اتالعان قۇجاتتى قر سىرتقى ىستەر ءمينيسترىنىڭ ورىنباسارى ەرجان اشىقباەۆ پەن اقش-تىڭ قازاقستانداعى توتەنشە جانە وكىلەتتى ەلشىسى ۋيليام موزەر بەكىتتى.

قازىرگى ۋاقىتتا اقش-تىڭ نيۋ-يورك جانە سان-فرانتسيسكو قالالارىندا قازاقستاننىڭ ەكى باس كونسۋلدىعى بار. الداعى ۋاقىتتا ەكى ەل اراسىنداعى ديپلوماتيالىق بايلانىستاردى ودان ارى نىعايتۋ جوسپارلانىپ وتىر. وسىعان وراي ەرجان اشىقباەۆ: «2018 جىلدىڭ قاڭتارىندا قر تۇڭعىش پرەزيدەنتى ن.نازارباەۆ اقش-قا رەسمي ساپارمەن بارىپ، وسى ەكىجاقتى قاتىناستارىمىزدى كەڭەيتىلگەن ستراتەگيالىق ارىپتەستىك دەڭگەيىنە شىعارۋ تۋرالى ۋاعدالاستىققا قول جەتكىزگەن بولاتىن. وسى كەلىسىم قازاقستان مەن اقش-تىڭ كونسۋلدىق لاۋازىمدى تۇلعالاردى جانە ولاردىڭ وتباسى مۇشەلەرىن ديپلوماتيالىق يممۋنيتەتتەرمەن، ارتىقشىلىقتارمەن قامتاماسىز ەتۋگە بايلانىستى ماسەلەلەردى رەتتەمەك. بۇل ءوز كەزەگىندە لاۋازىمدى تۇلعالاردىڭ قىزمەتىنە وڭ اسەرىن تيگىزەتىن بولادى»، – دەدى.

ال ۋيليام موزەر مالىمدەمەسىندە ەكى ەل اۋماعىندا قىزمەت ەتىپ جۇرگەن ديپلوماتتار ءۇشىن تولىق يممۋنيتەتتەر مەن ارتىقشىلىقتاردى قامتاماسىز ەتۋ باعىتىندا ءتيىستى قادام جاساپ وتىرعانىن اتاپ ءوتتى. موزەر سوزىندە: «قازاقستان مەن اقش تىعىز ەكىجاقتى قاتىناستاردى قامتاماسىز ەتۋ ءۇشىن ءبىرازدان بەرى بىرقاتار باستامالاردى ىسكە اسىرۋعا قاتىستى. ءبىز قازاقستاننىڭ اقش اۋماعىندا ديپلوماتيالىق قاتىسۋىن كەڭەيتۋ مۇددەسىن قولدايمىز. وسى ورايدا قازاقستاندىق ديپلوماتتار ءۇشىن ارتىقشىلىقتار مەن يممۋنيتەتتەردى قامتاماسىز ەتۋ  – ينۆەستيتسيا تارتۋ ارقىلى ەكونوميكانى دامىتۋ مەن ەكىجاقتى بايلانىستاردى ارى قاراي نىعايتۋعا ىقپال ەتەتىنى ءسوزسىز»، – دەپ مالىمدەدى.

"The Qazaq Times"