رەسەي ناتو اسكەرىنەن قاۋىپتەنىپ وتىر. قوس تاراپ اراسىندا شيەلەنىس ۋشىقپاۋى ءۇشىن، اليانس رەسەي شەكاراسىنا باعىتتالعان اسكەري ءىس-ارەكەتتى باياۋلاتۋى ءتيىس. رف قارۋلى كۇشتەرى باس شتابىنىڭ باسشىسى ۆالەري گەراسيموۆ وسىنداي مالىمدەمە جاسادى.

گەراسيموۆ ءوز سوزىندە: «رەسەيدىڭ شىعىس شەكاراسىنداعى اسكەري قيمىلداردى توقتاتۋى كەرەك. بالتىق ەلدەرى، شىعىس ەۋروپا مەن قارا تەڭىز ماڭىنداعى اسكەري نىساندار مەن ينفراقۇرىلىمداردى الىپ تاستاسا، شيەلەنىس تە ازايادى»، – دەدى.

1997 جىلى ناتو مەن رەسەي ءبىر-ءبىرىن قارسىلاس جاۋ كورمەيتىندىگى جونىندە كەلىسىم جاساعان بولاتىن. دەگەنمەن، رەسەي تاراپىنىڭ كورشىلەس مەملەكەتتەرگە قارسى قولدانعان «اگرەسسورلىق ساياساتى»، قىرىمنىڭ اننەكسيالانۋى، سولسبەريدەگى جاعداي، اقش-قا باعىتتالعان حاكەرلىك شابۋىل سىندى وقيعالاردان كەيىن، اليانس ماسكەۋگە قارسى سانكتسيالار ەنگىزىپ، تىپتەن يادرولىق سوققى جاساۋعا دايىن ەكەندىگىن ەسكەرتكەن.

4 ساۋىردە ۋاشينگتوندا ناتو-نىڭ 70 جىلدىعىنا وراي وتكەن جيىندا اقش مەملەكەتتىك حاتشىسى مايك پومپەو الەمدە «ۇلى دەرجاۆالار باقتالاسىنىڭ جاڭا ءداۋىرى باستالعانىن» ايتقان بولاتىن. ەكى كۇندىك جيىن كەزىندە ناتو ەلدەرى قارا تەڭىزدە اسكەري كەمەلەردى كوبەيتۋگە كەلىسىپ، ۋكراينا جانە گرۋزيامەن وتەتىن جاتتىعۋدى ارتتىرۋعا ۋاعدالاسقان. مۇنى وداق باسشىسى يەنس ستولتەنبەرگ جيىننان كەيىن حابارلاعان. سونداي-اق، ناتو مەن اقش رەسەيدەن تونەتىن قاۋىپ تۇرلەرىن تالقىلاپ، «قاي ۋاقىتتا دا دايىن بولۋ كەرەك» دەگەن قورىتىندىعا كەلگەن. ال رەسەي سىرتقى ىستەر مينيسترلىگى 4 ساۋىردە جاساعان مالىمدەمەسىندە ۋاشينگتونداعى ناتو كەزدەسۋى وداقتىڭ «رەسەيگە قاتىستى اسكەري جانە ساياسي دۇشپاندىعىن دوعارۋعا قۇلىقتى ەمەسىن كورسەتەدى» دەگەن.

"The Qazaq Times"