Resey NATO äskerinen qauiptenip otır

Resey NATO äskerinen qauiptenip otır. Qos tarap arasında şielenis uşıqpauı üşin, al'yans Resey şekarasına bağıttalğan äskeri is-äreketti bayaulatuı tiis. RF Qarulı Küşteri Bas ştabınıñ basşısı Valeriy Gerasimov osınday mälimdeme jasadı.

Gerasimov öz sözinde: «Reseydiñ şığıs şekarasındağı äskeri qimıldardı toqtatuı kerek. Baltıq elderi, Şığıs Europa men Qara teñiz mañındağı äskeri nısandar men infraqwrılımdardı alıp tastasa, şielenis te azayadı», – dedi.

1997 jılı NATO men Resey bir-birin qarsılas jau körmeytindigi jöninde kelisim jasağan bolatın. Degenmen, Resey tarapınıñ körşiles memleketterge qarsı qoldanğan «agressorlıq sayasatı», Qırımnıñ anneksiyalanuı, Solsberidegi jağday, AQŞ-qa bağıttalğan hakerlik şabuıl sındı oqiğalardan keyin, al'yans Mäskeuge qarsı sankciyalar engizip, tipten yadrolıq soqqı jasauğa dayın ekendigin eskertken.

4 säuirde Uaşingtonda NATO-nıñ 70 jıldığına oray ötken jiında AQŞ memlekettik hatşısı Mayk Pompeo älemde «wlı derjavalar baqtalasınıñ jaña däuiri bastalğanın» aytqan bolatın. Eki kündik jiın kezinde NATO elderi Qara teñizde äskeri kemelerdi köbeytuge kelisip, Ukraina jäne Gruziyamen ötetin jattığudı arttıruğa uağdalasqan. Mwnı odaq basşısı Yens Stoltenberg jiınnan keyin habarlağan. Sonday-aq, NATO men AQŞ Reseyden tönetin qauip türlerin talqılap, «qay uaqıtta da dayın bolu kerek» degen qorıtındığa kelgen. Al Resey sırtqı ister ministrligi 4 säuirde jasağan mälimdemesinde Uaşingtondağı NATO kezdesui odaqtıñ «Reseyge qatıstı äskeri jäne sayasi dwşpandığın doğaruğa qwlıqtı emesin körsetedi» degen.

"The Qazaq Times"