رەسمي كيەۆ پەن ۋاشينگتون ماسكەۋدى قاتاڭ سىنعا الدى.

«ۆلاديمير ءپۋتينىڭ ءوز ءوزىن دونباس جانە لۋگانسك حالىقتىق رەسپۋبليكاسى دەپ جاريالاعان ۋكراينا وبلىستارىنىڭ حالقىنا رەسەي ازاماتتىعىن الۋدى جەڭىلدەتۋ تۋرالى شەشىمى مينسك كەلىسىمىن جۇزەگە اسىرۋعا كەدەرگى كەلتىرەدى» - دەلىنگەن اقش مەملەكەتتىك دەپارتامەنتى جاريالاعان مالىمدەمەدە.

بۇعان دەيىن رەسمي كيەۆ اتالمىش ماسەلەگە بايلانىستى بىرىككەن ۇلتتار ۇيىمىنىڭ قاۋىپسىزدىك كەڭەسىنە شاعىمدانعان. ۋكراينا پرەزيدەنتى پەتر پوروشەنكو: «ماسكەۋدىڭ رەسەي ازاماتتىعىن الۋ پروتسەدۋرالارىن جەڭىلدەتۋى وڭتۇستىك وسەتيا مەن پريدنەستروۆيا ستسەناريىن قايتالاۋ. كرەمل وسى ارقىلى ايماقتاعى اسكەري ءىس-ارەكەتىن اقتاپ الماق» - دەپ مالىمدەدى.

ءوز كەزەگىندە پرەزيدەنت سايلاۋىندا جەڭىسكە جەتكەن ۆلاديمير زەلەنسكي كومانداسى «ماسكەۋ دونباس تۇرعىندارىنا رەسەي تولقۇجاتتارىن تاراتۋ ارقىلى ءوزىنىڭ ارانداتۋشى ەل ەكەندىگىن دالەلدەدى» - دەگەن مالىمدەمە تاراتتى.

ەستەرىڭىزگە سالايىق، ءساۋىر ايىنىڭ 24-ءى كۇنى كرەمل سايتىندا رەسەي پرەزيدەنتى ۆلاديمير ءپۋتيننىڭ: «دونباس جانە لۋگانسك ايماقتارىنداعى حالىقتىڭ ازاماتتىعى مەن بوستاندىعىن قورعاۋ ماقساتىندا رەسەي ازاماتتىعىن الۋ جەڭىلدەتىلسىن» - دەگەن جارلىعى جاريالانعان.

"The Qazaq Times"