2 ماۋسىمدا الماتىدا سكانديناۆيالىق ءجۇرىس بويىنشا Nordic Walking Fest ءبىرىنشى فەستيۆالى وتپەك. ءىس-شارانى قازاقستاندىق سپورتشى، وليمپيادا ويىندارىنىڭ كۇمىس جۇلدەگەرى ەلەنا حرۋستالەۆانىڭ وليمپيادالىق قورى ۇيىمداستىرادى.

اتالعان شاراعا قاتىستى وتكىزىلگەن ءباسپاسوز كونفەرەنتسياسىندا جۋرناليست اندرەي كۋكۋشكيننىڭ ايتۋىنشا، فەستيۆالدە سپورتتىق ديستانتسيا مەن كورپوراتيۆتىك كوماندالاردىڭ ءاربىر قاتىسۋشىسى ءۇشىن ۋاقىت بەلگىلەنىپ، قوزعالىستى سىرتتاي تورەشىلەر باقىلايتىن بولادى. مۇمكىندىگى شەكتەۋلى قاتىسۋشىلار فەستيۆالگە تىركەلۋ جارناسىنان بوساتىلعان. سونداي-اق، بارلىق قاتىسۋشىلارعا ماقتاۋ قاعازدارى مەن ارنايى جۇلدەلەر تابىستالادى.

قور ديرەكتورى، ۆانكۋۆەردەگى وليمپيادا ويىندارىنىڭ كۇمىس جۇلدەگەرى ەەنا حرۋستالەۆا: «جالپى العاندا، ەلەنا حرۋستالەۆانىڭ وليمپيادالىق قورىن ءبىز ەلىمىزدىڭ داڭقتى ءالپينيسى ماقسۇت جۇماەۆپەن جانە فريستايل بويىنشا الەم چەمپيونى يۋليا گالىشەۆامەن بىرلەسىپ، سپورتشى جاستاردى قولداۋ، تاجىريبە الماسۋ ماقساتىندا قۇردىق. وسى رەتتە ۇيىمداستىرىلىپ وتىرعان سكانديناۆيالىق ءجۇرىس – ءوزىڭىزدى جاقسى قالىپتا ۇستاۋعا مۇمكىندىك بەرەتىن، بارلىق جاستاعى ادامدارعا ارنالعان فيتنەستىڭ ادەمى ءتۇرى. ومىرتقاعا جاقسى اسەر ەتەدى.قان تامىرلارى مەن جۇرەك-قان تامىرلارىنىڭ جۇمىسىن جاقسارتادى. قاراپايىم جۇرىستەن بۇل ءجۇرىستىڭ ايىرماشىلىعى وتە كوپ. بۇل سپورتتا  وزىن-ءوزى باستان-اياق قالىپتى ۇستاپ، ءجۇرىستىڭ زاڭىن بۇزباعان جۇرگىنشى عانا ارتىق سالماقتان ارىلىپ، جاقسى ناتيجەگە قول جەتكىزە الادى. Almaty Nordic Walking Fest بەلسەندى ازاماتتاردىڭ كوڭىلىنەن ورىن تابادى دەگەن ۇمىتتەمىن»، – دەپ اتاپ ءوتتى.

Almaty Nordic Walking Fest شاراسى الماتى قالاسىنىڭ 2019 جىلداعى سپورتتىق وقيعالارى ءتىزىمىنىڭ كۇنتىزبەسىنە ەنگىزىلدى. الماتى قالاسى سپورت باسقارماسىنىڭ باسشىسى رۇستەم بايتاسوۆ سكانديناۆيالىق ءجۇرىستىڭ قالا جانە تۇرعىندار ءۇشىن ماڭىزىنا ەرەكشە توقتالدى.

فەستيۆالدى وتكىزۋ بويىنشا سەرىكتەس ماكسيم پروششەنكو باسقاراتىن «ەۋرازيا» مەكتەبى بولىپ وتىر. مەكتەپ ماماندارى كاسىپقوي قازىلىقتى ۇيىمداستىرۋعا، جارىس قاتىسۋشىلارىمەن قاشىقتىقتان ءوتۋ ۋاقىتىن ولشەۋگە، تراسسالاردى بولۋگە جۇمىلدىرىلادى. سونىمەن قاتار، ارنايى شەبەرلىك ساباقتارى مەن جاتتىعۋلار وتكىزىلەدى.

سكانديناۆيالىق ءجۇرىس —  سپورتتىڭ جاڭا ءتۇرى. بۇل جۇرىسپەن ەۋروپالىقتاردىڭ اۋەستەنە باستاعانىنا كوپ بولعان جوق. 1990-جىلدارى عانا ەۋروپاعا كەڭىنەن تانىلا باستادى. 2000 جىلى حالىقارالىق سكانديناۆيالىق ءجۇرىس وداعىندا  تەك قانا ءۇش مەملەكەت بولسا، قازىر ونىڭ قاتارى جيىرمادان اسادى. وداقتىڭ شتاب-پاتەرى فين قالاسى ۆانتادا ورنالاسقان.

ايتا كەتەيىك، سكانديناۆيالىق ءجۇرىس بويىنشا فەستيۆال 2 ماۋسىمدا «اتاكەنت» كورمە كەشەنىنىڭ الاڭىندا وتكىزىلەدى. قاتىسۋعا ىنتا بىلدىرۋشىلەر www.nordicwalkingfest.kz ارقىلى ونلاي-تىركەۋدەن وتە الادى. سكانديناۆيالىق ءجۇرىس فەستيۆالى الداعى ۋاقىتتا قىرعىزستان، وزبەكستان سىندى ەلدەر مەن نۇر-سۇلتان، شىمكەنت قالالارىندا وتكىزىلەدى.

"The Qazaq Times"