رف سىرتقى ىستەر ءمينيسترىنىڭ ورىنباسارى الەكساندر گرۋشكو «رەسەي مەن ناتو ازاماتتىق جانە اسكەري باعىتتاعى ىنتىماقتاستىقتى تولىق توقتاتتى» - دەپ مالىمدەدى.

​"بۇگىنگى رەسەيدىڭ ناتو-مەن قارىم-قاتىناسى قىرعي-قاباق جىلدارىن ەسكە سالادى. ناتو-نىڭ ءوزى رەسەيمەن وڭتايلى قارىم-قاتىناستان باس تارتىپ وتىر", –دەدى گرۋشكو.

گرۋشكو سونىمەن بىرگە ناتو-نىڭ بىلتىرعى شىعىنى تريلليون دوللاردان اسقانىن، بۇل رەسەيدىڭ قورعانىس سالاسىنا بولەتىن بيۋدجەتىنەن 22 ەسەگە كوپ ەكەنىن جەتكىزدى.

"ناتو-مەن قارۋلى قاقتىعىسقا كەلەتىن بولساق، بارلىق دۇرىس ويلايتىن ادامدار بۇعان جول بەرىلمەيدى دەپ ۇمىتتەنەدى. بۇل ادامزات ءۇشىن ۇلكەن اپات بولار ەدى. مۇنى ۋاشينگتون دا، بريۋسسەل دە جاقسى ءتۇسىنىپ وتىر", – دەدى رەسەي ءسىم ورىنباسارى.

"The Qazaq Times"