ترامپ يراننىڭ رەسمي كۇشتەرىن تەررورلىق توپ قاتارىنا قوستى. فوتو:Daily Express.

ءبىر كۇن بۇرىن اقش پرەزيدەنتى جاساعان مالىمدەمەدە، يراننىڭ يسلام رەۆوليۋتسياسى ساقشىلار كورپۋسىن حالىقارالىق تەررورلىق ۇيىم رەتىندە تانىلدى. بۇل اقش-تىڭ العاش رەت باسقا مەملەكەتتەردىڭ رەسمي اسكەري كۇشتەرىن تەررورلىق ۇيىم رەتىندە جاريالاۋى. قۇراما شتات ۇكىمەتى يسلام رەۆوليۋتسياسى ساقشىلار كورپۋسىن حالىقارالىق تەرروريزمدى دامىتۋعا قولداۋشى بولىپ كەلەدى دەپ قارايدى.

يسلام رەۆوليۋتسياسى ساقشىلار كورپۋسى 1979 جىلى شاح تاقتان قۇلاعاننان كەيىن قۇرىلعان. نەگىزگى ماقساتى ير رەجيمىن قورعاۋ جانە يراننىڭ قارۋلى كۇشتەرىمەن بىرگە ەلدىڭ قاۋىپسىزدىگىن قامتاماسىز ەتۋ. مالىمەتتەرگە قاراعاندا، اتالعان ۇيىمنىڭ 150 مىڭ مۇشەسى بار. بۇل كورپۋستىڭ وزىنە ءتان اۋە، قۇرلىق جانە تەڭىز كۇشتەرى بار. بارلاۋ جانە ارنايى قىزمەتكە دە يە.  

اقش-تىڭ كەزەكتى شەشىمىنە قارسى يران دا ءۇنسىز قالعان جوق. تەھران (تەگەران) بيلىگى اقش-تىڭ تاياۋ-شىعىستاعى اسكەري كونتينگەنتىن تەررورلىق ۇيىم قاتارىندا تانيتىنىن جاريالادى. بۇعان دەيىن قۇراما شتاتتاردىڭ سانكتسياسى تەك يسلام رەۆوليۋتسياسى ساقشىلار كورپۋسىنا قاتىستى جەكە تۇلعالارعا عانا قاراتىلىپ كەلگەن. اقش مەملەكەتتىك حاتشىسى مايك پومپەو يرانعا قارسى سانكتسيالاردىڭ جالعاسا بەرەتىنىن ايتتى. ول جانە ءوزىنىڭ الەۋمەتتىك جەلىدەگى پاراقشاسىندا يرانداعى بوستاندىق اڭساعان ازاماتتارعا قولداۋ كورسەتۋ كەرەك ەكەنىن دە ايتقان.

تەھران مەن ۋاشينگتون اراسى ترامپتىڭ يادرولىق كەلىسىمنەن شىعىپ كەتۋىنەن كەيىن الا تايداي بۇلىنگەن. اتالعان يران يادرولىق كەلىسىمىنە («ورتاق قادام كەلىسىمى»  دەپ تە اتالادى) 2015 جىلى ماۋسىمدا قول قويىلىپ، 2016 جىلى قاڭتاردان باستاپ اتقارىلعان. ترامپ 2018 جىلى مامىر ايىندا بۇل كەلىسىمنەن شىعىپ كەتتى. كەلىسىمنەن شىعىسىمەن اقش يرانعا باعىتتالعان سانكتسيالاردى قالپىنا كەلتىرىپ، يراننىڭ يادرولىق باعدارلاماعا قاتىستى ارەكەتتەرىنە شەكتەۋ قويعان. ال، يران تارابى اقش-تىڭ بۇل ارەكەتتەرىن حالىقارالىق كەلىسىمدى بۇزۋ دەپ ايىپتاعان. ءوزىنىڭ يادرولىق ايماقتارىنا بۇۇ-نىڭ باقىلاۋشى ينسپەكتورلارىن كىرگىزۋگە كەلىسكەن، الايدا ولار باقىلاۋ الدىندا يادرولىق ايماقتىڭ رۇقساتىن الۋ شارتىن قويعان.

اقش بيلىگى اۋعانستان، ءسۇريا جانە يراك داعدارىستارىن جاۋاپكەرشىلىگىن يرانعا جاۋىپ كەلەدى. يسلام رەۆوليۋتسياسى ساقشىلار كورپۋسى وسى ەلدەرگە بۇلىكشىلەردى جىبەرىپ تۇرادى دەپ ايىپتايدى. ترامپ بيلىگى بۇل ۇيىمدى وزدەرىنىڭ سەنىمدى قارجى كوزدەرى ارقىلى دۇنيە جۇزىنە تارالعان تەررورلىق توپتاردى قارجىلاندىرىپ وتىرادى دەپ قارايدى.

ەڭ قىزىعى، ترامپتىڭ بۇل شەشىمىن اقش-تىڭ ەكى پارتياسى تەڭدەي قولداپ جاتقانى ايتىلادى.

“The Qazaq Times”